Sepai peria maliba ajanga Papua New Guinea nung nisung 24 taküm sama

Port Morseby, Chiteni/July 10 (Agencies): Papua New Guinea nung temzüng ozüng shidak maliba ajanga tribal nisungtem raratepba mapang mashisa tetsür ana dena nisung 24 taküm samaogo, kong ato kilonseri tapet temerenshi agütsütsü Bodhbarnü nangzükogo.
Linük anüolen Hela province nung kin balala tsüngta anogo asem raratepba mapang nisung tajemba agi 24 taküm sama, ta yangji alir ketdangsertemi ashi.
Papua New Guinea nung kin balala tsüngta century aika rara arur, saka automatic nok-o-nü aruba sülen azüdokshi tali akümer.
“Anogo asem tsüngta nisung 24 asüba jangjaogo, saka tanü tashinung asür timba alitsü akok. Lendong atalokba tesem nungi ketdangsertemi osang agütsüba atar,” ta Hela provincial administrator William Bando-i Bodhbarnü osangbener dang ashi. Iba tesem nung ketdangser 40 shi yaritsü asoshi police 100 shi yokogo, ta Bando-i ashi.
Iba lendong ajanga linük aser tang tesüsa shimtetba Ato Kilonser James Marape aoksa, aser lendong alatokba tesem ya Marape’er constituency nung dena lir.
Pai sepai tali yoktsü nangzük aser lendong agütsür dang “nenok mapang temogo” ta ashi.
“Kü taküm nung tanü ya tejashitiba anogo lir,” ta pai sangdong ka nung ashi.
“Ozü constituency kübok Munima aser Karida yimtsüng nungi tai maketba tanur aser tetsütem aika tepsetogo,” ta Marape-i ashi. Karida tesem nung minute 30 tsüngta tetsür trok aser tanur ti aser mashisa aliba tetsür ana den ano maso aliba tanurtem khaset.
Local health worker Pills Kolo-i ashiba agi, nisung kar temangbo ajitettsü tasak liasü aser mosquito net amshia temang shilem karbo bendena liasü.
Yangji aliba police temi sayuba noksa nung tanur ana indang tasümang dena liasü, kong kabo tekolak nung yirur liasü. Anogo ka tejakdang mita atar nisung trok tepsetba mangyanga lendong ya tanaben tenzükshi, ta yangji aliba osangbener temi ashi.
“Prangbong bena aliba mapa tamajung inyakertem, nenok mapang temogo. Tai maketba nisungtem tepsetba asoshi ni kechi inyakdir iba mapa nungi angazükang, ni nenok madak ozüng tesashitiba amshitsü tsübua mali. Tasüba temerenshi ya ozüng ka lir,” ta Marape-i ashi.
Kechi ajanga lendong ya tenzükar mejangjateter, saka aiben akhi mapang nung mapa tamajung inyakba aser ali agi raktepba mechi azüdokshia aru.
Anasa aliba Enga province nunga kasa azüdokshi tenzükba ajanga mitkartem yok aser Sandhurst nung training agir aliba major ka lenisüba nung sepai 100 shi yoka liasü.
“Kodaser nütsüng 400,000 aliba province ka nung police 60 yokba aser mapang shia mitkartem oa operation agiba ajanga temzüng ozüng amshitettsü,” ta paisa ashi.