Sepaitem ajurutsü atema tanurtem ajungshitsü: Smriti

New Delhi, November 14 (Agencies): Tanurtem anogomung nung Human Resource Development Union Minister, Smriti Irani-i, tanurtem mulungjang nung junga angatetdaktsütsü aser sepaitem mapa atema linüki parnok dang pelaba lemsatsü atema arrtsülen aliba sepaitem ajurutsü asoshi tanurtem ajungshitsü, ta ashi.
“January 26 nü onoki programme ka ‘Seema Darshan’ ayonga akatsü. Asen sepaitem arrtsülen lir. Sepaitem koma inyaker, ibaji metetdaktsütsü atema state tem nungi tanur teshimtet kar anir aotsü,” ta laisa ashi.
Laisa ashiba agi, rara aliba mapang nung sepaitem tanela akasodaktsütsü atema artist karibo arrtsüleni oa sepaitem semdanger.
“Tanübo tesünep nung lir. Art ajanga ajaklen ayimsünga prokshia alima ajak dang yimjung osang proker. Ni National Bal Bhawan dang, tangar dang alia inyakteter tanurtem arrtsüleni anir oa asen sepaitem mapa reprangdaktsütsü mepishir,” ta Irani-isa ashi.
Children’s day anogomung nung Delhi, National Bal Bhawan nung sentong ka nung jembidang HRD minister-i sentong ayongertem dang iba ‘Seema Darshan’ programme nung shilem agitsüpur tanurtem shimang, ta ashi.
Irani-isa, December ita nung ‘Kala Utsav’ akatsü aser iba sentong nung state balala nungi school tanurtemi shilem agia pei sobaliba aser art sayatsü. Iba mapang nung tetoktepba akatsü aser takoker school nem senpet lakh 5 agütsütsü, ta metetdaktsü.
Bal Shree awards sangküm January nung agütsütsü, ta laisa ashi.
Iba sentong nungsa Irani-i ketdangsüa kiralongrartemi Paris amakba lendong nung asürtem bilemteta minute ana shi mokremer akhüm agütsü.