Sepaitem den kahtepdang KPLT telungpur trok asü

Guwahati/Diphu, September 23 (Agencies): Tanü Hokolbarnü East Karbi Anglong district, Assam nung sepaitemi mita aoba mapang Karbi People Liberation Tigers (KPLT) telungpur den kahtepdang telungpur tanishir parnok trok tashi kahsetogo.
Tasür telungpur trok rongnung KPLT ‘Operation Commander’ aser ‘Area Commander’ nata densema lir, ta Defence otongdari Guwahati nung metetdaktsü.
Police aser Army na lokteper mita aoba mapang KPLT pur indang tesepa ka makdokogo aser iba tesem nungi prangpong, injang aser raradang amshiba osettsüset tapu balala nguteta lir.
Bokajan police station kübok, Nambar Reserve Forest nung KPLT tesep lir ta osang tejangja angashiba sülen item telungpur aputsü aser parnok tesep samatsütsü atema Brihostibar nikongdang Army aser Assam police na lokteper mita ao, ta Defence otongdari ashi.
Hokolbarnep 1:00 ako meta Army temi telungpur tesep angudang yangji prangpong amer aliba telungpurtem jagi injang akahtsü tenzükba ajanga sepaitemia meyipa prangpong agi akahdang telungpur pezü yangji kahset, ta otongdarisa ashi.
Tanüngba telungpurji arem nung atsüka jena aotsü merang saka idangji sepaitemi ano maneni injang agi kahmesoa katepdang ano telungpur ana kahsetsem, ta paisa ashi.
Sepaitemi INSAS Rifle ka, 7. 62mm Self Loading Rifle (SLR) ka, country-made rifle ka, hand grenade ana, injang aika, injang terep kar, nok trok, solar charger kar, blanket kar aser ano raradang amshiba oset kar den chiyungtsüa kar ngutet, ta otongdari ashi.
Karbi National Liberation Front (KLNF)-i ceasefire sangdongba sülen 2010-11 mapang KPLT telok ya tentet aser iba telok ya Bokajan len meimlaba tesem nung kanga bulua lir. Parnoki ozüng alema sen sarur aser kinungertem dang sen akhangtsü atema nisung pua bener aoer.
Superintendent of Police Debojit Deuri-i, “Tang ya kahseter aliba telungpurtemji jangjatsü merangba mapa lir,” ta osangbener dang ashi.