Sepaitem taküm jenjang tajungba atema mera agidar: Kiren Rijiju

New Delhi, January 12 (Agencies): Paramilitary sepaitem mesenmetui amshiba osang jungkai adokba sülen tanü sorkari, item ama tatalokba ajakji süoki ia agir aser sepaitem taküm jenjang den chiyungtsü tajungba agütsütsü atema mera agidar, ta metetdaktsü.
Tanü New Delhi nung osangbenertem den jembidang Union Minister of state for Home, Kiren Rijiju-i, “Aika jungkai adokdar aser onoki itemji süoki ia agir. Onoki iba (CRPF) ya süoki ia agir. Tarutsü nungbo item ama tatalokbatem malitsü atema onoki inyaktsü,” ta metetdaktsü.
CRPF sepai, Jeet Singh-i social media nung video ka ajanga, paramilitary sepaitem nem agütsüba chiyungtsütemji Army den khenyongi balala, ta sangdonga liasü.
Video nungji Singh-i, “Onok nem canteen facility magütsür. Onoki medical facilities mangur. Onok pension anenogo. Onoki sodi-a mapang shitak nung mangur. Saka onok mapabo teti ulura,” ta jembia lir.
Tawa BSF sepai, Tej Bahadur Yadav-i, arrtsü anüker security sepaitem nem chiyungtsü kanga mejungi agütsür, ta jembiba sülen anogo ishika tsüngda CRPF sepai Singh-i video ajanga iba osang prokshia liasü.
Rijiju-i, chiyungtsü jenjang ajungkettsütsü nüngdak aser sorkari iba atemaji inyakdar, ta ashi.
CRPF sepai kati jembiba o dak sentakba nung Minister of State for Home, Rijiju-i, item tatalokbaji junga bushisüngdangtsü nüngdak, aser iba atema report atadar, ta ashi.
“Iba (CRPF) tatalokba indang osang tejangja tama atadi. Tang iba atema jembitsüji tim masü,” ta paisa ashi.
Yadav-i jembiba o dak sentakba nung Rijiju-i, BSF dang nungi report kabo nguogo aser, sepaitem nem chiyungtsü junga agütsütsü atema mera aika agia inyakdar, ta metetdaktsü.
“Onoki iba onük ya süoki ia agidar,” ta paisa shisem.
Ketdangsertem osang ka ajanga angazükba agi, Home Minister Rajnath Singh-i item tatalokbatem asadangdar, iba den külemi pai ketdangsertem dang mera tajung agitsü atema tuyuogo.