Sepaitemi meiner truck gari 500 tashi Imphal tongogo

Imphal, January 8 (Agencies) : Deobarnü Manipur state aser central paramilitary forces-i meiner truck gari 500 den teimba Assam nungi Manipur yimtiba Imphal tongogo.
Naga nungertemi national highway ana mokdangaka tanü garitem timtem kecha majurui dang Imphal atong.
Assam kübok Silchar district nungi Imphal tashi National Highway-37 nung truck gari 511 tashi Imphal atong. Garitem nung totzü aser tanga nüngdakba chiyungtsü aser osettsüsettem den kisüdang amshiba osettem aser mazütem bena liasü, ta ketdangsertemi metetdaktsü.
Ano taruba shilem nung truck gari 531 tashi meintsü, ta ketdangsertemisa shisem.
Deobarnep Naga nungeri mokdangba pusemer kari Kotland anasa national highway nung truck gari ka nung mi senoktsü saka iba dak sendakba nung nisung shinga mapu, ta osang ka ajanga ashi.
Manipur sorkari district tasen ana tentettsü telemtetba agiba anema United Naga Council (UNC)-i yaküm November 1 nungi rongsenkettsüng tsütsü mokdangba sentong ayongzüka liasü.
District tasentem tentetba ajanga akhidang nung Naga nunger lushi asüba tesem aika lemsatsü ta UNC-i ashir.
Tongtipang lenmangtem mokdangba ajanga Manipur nung achiajemtsü aser osettem nung jenjang kanga ajungketogo.
Shishilembartemi ashiba agi garitem Jiribam district headquarters nung anogo aika ‘armed escorts’ atema anendentsüsa akümer aser parnoki taa talila meshir.
Manipur sorkari Centre dang iba onük asoshi tiyongtsüi aita olemtep tenzüktsü atema mepishi saka tang tashi New Delhi nungi telangzüba kecha mali.