Separatists-i CM Mufti-i mepishiba magizük

Srinagar, September 04, 2016: Deobarnü Srinagar nung Union Home Minister, Rajnath Singh leniba nung party ajak nungi teshimtet lenirtemi Jammu & Kashmir sorkar den senden amenba angur. Kasa noksa nung Finance & Corporate Affairs Union Minister, Arun Jaitley aser Jammu & Kashmir, Mehbooba Mufti na den tangar ketdangsertema angur.

Srinagar, September 04 (Agencies): Jammu & Kashmir Chief Minister, Mehbooba Mufti-i Separatist tem dang Union Home Minister, Rajnath Singh-i aniba party ajak nungi teshimtet lenirtem telok ajurutsü mepishia liasü, ajisüaka Deobarnü Seperatist-i lai mepishibaji magizük.
Yashi PDP tongti lenir aser chief minister, Mehbooba-i separatists lenirtem- Syed Ali Shah Geelani, Mirwaiz Umar Farooq (Hurriyat Conference telok balala nungi) aser Yasin Malik (JKLF) nunger jaoka liasü, ajisüaka parnoki lai mepishiba magizük.
Yashi Mehbooba Mufti-i Seperatists tongti lenirtem dang Centre nungi party balala nungi teshimtet telok ajurua telatetba tajung ka dangi arutsü atema ken o jembitsüla, ta mepishia liasü.
Mehbooba-i separatists lenirtem dang Union Home Minister, Rajnath Singh-i aniba teshimtet telok ajurutsü atema temepishiba shidi zülu.
“Ni J&K Peoples Democratic Party Tir ka ama iba shidi zülur aser nenok dang state semdangtsü aliba All Party Delegation of Parliamentarians ajurua jembitsü mepishir,” ta state chief minister-i züluba shidi nungji shia lir.
“Ibaji yimtenren ken o jembi tenzüker ka asütsü aser tensa mejungi aliba atema bangzüng latettsü asoshi maparen tetenzüker ka asütsü,” ta Mehbooba-i separatists lenirtem dangi züluba shidi nungjisa shia lir.
Tanü Srinagar nung taoba mapang Jammu & Kashmir Chief Minister, Omar Abdullah-ia Rajnath-i aniba telok ajuruogo. Iba mapang nung Omar-i, meranga inyakba ajak amajok, kechiyong taoba mapang nunga item ama semdangba sülen follow-up maliasü, ta ashi.
Iba dak sentakba nung Omar-i, “Kodang tensa süngjema kümdir, item onük nung inyakba mapa tembanger, aser kecha meinyaker” ta ashi.
“2010 küm party ajak nungi teshimtet teloki semdangba koma tembang. Iba sülen kecha meinyak, anungji pei teka nung mapa jenti bener aotsü arur MP tem-i tamang katettsüsa inyaktsüla,” ta pai ashi.
Paisa, taoba mapang Ato kilonser, PV Narasimha Rao-i aika nangzük, saka kecha meinyaktsü, ta ashi.