Sept. 1 nü Asteroid tulu ka alima anasa süitsü

Washington, Aug 18 (Agencies): Alima dang tuluba Asteroid ka tenüng agi ‘Asteroid Florence’, Sept. 1, 2017 nü alima nungi 4.4 million miles, (7.0 million kilometers, mesüra 18 Earth-Moon distances) pilar ajanga süitsü. Florence ya alima anasa aliba asteroids tulutiba tem rongnung ka lir.
Iba asteroid ya 2.7 miles (4.4 kilometers) shi tulu lir ta NASA’s Spitzer Space Telescope & NEOWISE mission janga asadangteta lir.
September 1,2017 nü alima ajanga süitsü aliba Asteriod dang nungia tanga mapang süiba asteroid temi alima kanga anasa süiba jangjateta lir, ajisüaka item asteroid temji Florence dang kanga agi tilabatem liasü, ta Jet Propulsion Laboratory, Pasadena, California agency nung manager of NASA’s Center for Near-Earth Object Studies (CNEOS) Paul Chodas-i ashi.
“NASA-i alima anasa mesüra ajanga süitsü aliba asteroid tem asadanga metettsü merangba maparen tenzüker sülen nungi tang süitsü aliba asteroid Florence ya item asteroid tem rongnung tulutiba lir, ta paisa ashi.
Iba asteroid ya alima kanga anasa süiba ajanga ‘Florence’ asadanga bushisüngdangtsü asoshi scientist tem nem maongka tajung agütsür aser ali nung amena aliba radar tem indang nükjidong ataloktsütsü. Radar imaging ya NASA meyong Goldstone Solar System Radar, California aser National Science Foundation indang Arecibo Observatory, Puerto Rico tesemtem nung amenoka lir. Anungji tan tangoktsü aliba radar noksatem ajanga ‘Florence’ tasazük chichiba putettsü aser iba asteroid tema nung feet 30 (10 meters) telungtet tashi nung kechisa lir itemji tali tejangjaba nung metettsü.
Asteroid Florence ya Schelte “Bobby” Bus-i 1981 küm March ita nung Siding Spring Observatory, Australia nungi ngutetba sülen iba asteroid nem ‘modern nursing’ yimya ngutetla Florence Nightingale (1820-1910) tenüng jaloktsü. 1890 küm nungi iba asteroid alima ajanga süiba asadanga aruba rongnung 2017 küm süitsü aliba ya anasatiba asütsü aser iba sülen yabo 2500 tashi iba amai anasa mesüitsü.
Florence ya August tatemlen aser September tetenzüklen kanga tesangwa asütsü aser constellations Piscis Austrinus, Capricornus, Aquarius aser Delphinus tem ajanga süiba mapang telescope tilatem agi kanga junga angutsü.
Radar amshia asteroids noklang aika asadanger aser item indang orbit lenmangtemji ‘deep space radar’ ajanga meteter kechiba süra iba inyakyim ya kanga tashi tait lir.
NASA indang Deep Space Network ji JPL ajanga achaayanger aser parnoki iba den külemi Goldstone Solar System Radar ketdang asüba den NASA meyongsa ‘Near-Earth Object Observations Program Center’ asoshi ‘Near-Earth Object Studies’ ta ajaba inyakyima Planetary Defense Coordination Office ajanga agency meyong Science Mission Directorate nungi inyaktsür.