Sept 3 nü Narendra Modi’er Cabinet ulushitsü

New Delhi, September 01 (Agencies): Deobarnü Ato kilonser, Narendra Modi-i council of ministers tasenpurtem tenüng sangdongtsü, ta tanü sorkar ketdangsertem osang ka ajanga metetdaktsü.
Deobar anepdang 10:00 ako nung Rashtrapati Bhawan nung cabinet tasenpur tenangzükba agitsü. 2014 küm Centre nung BJP-i aniba NDA sorkar tashii aruba sülen Modi-i tang agi tasembenbuba aser tesüsabuba cabinet ulushitsü.
“Deobar anepdang 10:00 ako nung Rashtrapati Bhavan nung tenangzükba agitsü atema inyakdar,” ta sorkar ketdangser kati ashi.
Tenangzükba agiba sülen Ato kilonser, Narendra Modi, BRICS senden nung adentsü atema China-i aotsü.
Tawa BJP National Tir, Amit Shah-i Union Minister aika ajuruba sülen cabinet nung ministry melentepba den külemi tasenpur anioka cabinet ulushitsü, ta osang proka liasü.
Iba den külemi assembly election agitsü aliba state tem-Gujarat, Karnataka aser Himachal Pradesh atema tongtibang lenirtem shimtsü. Tang cabinet asetshiba ajanga item state nungi MP tema kar cabinet nung anioktsüa akok.
Tang tashi nung junior minister pezü- Rajiv Pratap Rudy, Sanjiv Kumar Balyan, Faggan Singh Kulaste aser Mahendra Nath Pandey nungeri parnok menden nungi sodi meshiogo. Union Cabinet Minister, Uma Bharti-ia sodi meshi saka tang tashi nungbo la nem sodi agütsüba osang mejangjar.
Tawa train lendong aika atalokba sülen Union Railway Minister, Suresh Prabhu-ia sodi meshi, ajisüaka Ato kilonser, Modi-i pa dang khen ataa alitsü asüngdang.
Tang tashi nung Council of Minister menden tazüng asem lir aser item rongnung, Manohar Parrikar (Goa CM)-i Defence minister menden azüngtettsüba, M Venkaiah Naidu (tatong Tir)-i Information & Broadcasting Minister menden azüngtettsüba aser Anil Madhav Dave asüba ajanga MoS Environment & Climate Change (Independent Charge) menden azüngteta lir.
Yasüng Amit Shah Ato kilonser, Modi’er kidangi ao aser iba mapang nung tatemsa tenati cabinet ulushitsü atema jembiogo, ta osang angazüker.