Sept 30 tashi income osang metetdakjang: Modi

New Delhi, June 26 (Agencies): Deobarnü 21buba ‘Mann ki Baat’ radio sentong nung Ato kilonser, Narendra Modi-i linük sensotem dang, taküm September 30 nü tashi nung pei income memetetdaktsüi aliba metetdakjang, iba mapangji süirbo nenoki timtem ajurutsü, ta metetdaktsüogo.
“September 30 nü tashi nung sen aruba memetetdaktsüi aliba osang metetdakjang ta ni ajak ajungshir. Timtem majurutsü atema iba ya tatemsabuba maongka lir,” ta Modi-i ashi.
“Ozüngtem raksaba ajanga asenok yimjung malir, kechiba aseni sen ajangzükba aser asen kiojen osang shitak sorkar nem magütsür (?),” ta pai asüngdang.
Paisa, kobi melii sen aruba memetetdaktsüba jangjatsü atema revenue department-i inyakyim ka tenzüktsü, ta metetdaktsü.
Pai income tax, revenue aser excise department tem nung ketdangsertem dang saru agütsürtem den temulung lemteptsütsa tesentaktep yangluang, ta tetuyuba agütsü.
Modi-isa ashiba agi, ki tulu nung alirtemji küm nung sen lakh 50 dang ishibabo mengui alitsü.
“Sorkari mapa inyaker kati pa indang ita shia pension sen 16,000 nungi sen 5,000 tenlaba linük ka nung shingaia saru magütsüi malitsüla,” ta pai ashi.
“Nütsüng billion ka aliba linük nung kodaser küm nung saru lakh 50 agütsür nisung lakh 1.5 dang (?),” ta Ato kilonseri asüngdang.

You must be logged in to post a comment Login