Sept 5 nü PM Modi-i Myanmar semdangtsü

New Delhi, September 01 (Agencies): September 5, 2017 nü India Ato kilonser, Narendra Modi-i Myanmar linük semdangtsü, aser iba mapang nung linük anati tezüngzüktep aika agitsü imlar, iba den külemi pai Myanmar lenirtem den Rohingya nunger linük nungi ajenba densema tongtibang onük aika jembitsü.
Linük anatisa security aser defence nung amalitepa inyaktsü atema jembitsü, India-i yaria Myanmar nung inyakba project balala atema jembitsü aser Indo-Myanmar arrtsü nung telungpurtem tebilemtsü onüktem nung o lemteptsü.
Modi-i anogo asemnü atema Myanmar semdangtsü.
September 6, 2017 nü Ato kilonseri Myanmar State Counsellor, Aung San Suu Kyi den onük aika nung o lemteptsü, ta Bangladesh aser Myanmar joint secretary in-charge, Sripriya Ranganathan-i tanü metetdaktsü.
External Affairs Ministry nung inyaker Sripriya-isa, linük ana leniri Myanmar, Rakhine nung rara aser minority, Rohingya nungertemi linük toktsür ajenba onüka jembitsü, ta metetdaktsü.
Myanmar nungi Rohingya Muslim nunger 60,000 shi ozüng alema India telungi aitogo, aser security kuli nung ajemdaker sorkari parnok tanaben meyipa yoktsü sentong lir.
Myanmar nungi Modi China-i oa BRICS senden nung adentsü.
September 5 nü Modi-i Myanmar Tir, Htin Kyaw-a ajurutsü, ta Sripriya-isa metetdaktsü. Burma nung Muslim Rohingya nunger million 1.1 shi mesenmetui amshiba atema anüdoklen aliba linüktemi linük lenir, Aung San Suu Kyi aitsüdar.