Sept nungi Aadhaar Centres sorkar building nungang amenoktsü

New Delhi, July 02 (Agencies): Aadhaar agütsüba authority UIDAI-i state ajak dang taküm September ita nungibo Aadhaar enrolment ajak sorkar mesüra municipal tesemtem nung ang amenoktsü metetdaktsü.
Iba tetuyuba ajanga tang India tesem balala nung enrolment centres 25,000 alibaji ketdangsertem küboki indangindanga aittsü.
Iba tetuyuba ajangasa nija operator temi nüburtem dang nungi sen tali agiba nokdangtsü, kechiyong September ita nungibo enrolment aser update asübaji sorkar ketdangsertem kübok inyaktsü.
Unique Identification Authority of India (UIDAI) CEO, Ajay Bhushan Pandey-i shidi ajanga state ajak dang July 31, 2017 anogo tashi nungbosa sorkar kiojen nung centres amenoktsü atema jangjatsü/shimtsü metetdaktsü.
June 28, 2017 nü state chief secretary tem dangi züluba shidi nung UIDAI-isa, tang aliba enrolment centres belenba maparenji August 31, 2017 tashi nungbosa inyaktsüla, ta metetdaktsü.
Pandey-i ashiba agi, tang nija tesemtem nung aliba enrolment centres ji district collectorates, zila parishad office mesüra municipal office ama sorkar building temi belentsüla.
Enrolment centres ji state sorkar meyong banks, block offices, taluk offices mesüra delivery office temia belentsü akok.
Pandey-i “Enrolment centres kong aliar manguba indang nüburtemi nemnemer aser onok nem metetdaktsür. Mesüra parnok centre-i aodang aji shibanger alir. Ano karibo sen tali meshiba atema nemnemer. Nija agency tem atema mera takhangba agiba ajanga nüburtem tajungtiba tenzüktettsü,” ta metetdaktsü.
UIDAI-isa, mezüng iba maparen tenzükdang block shia mesüra taluk shia nung tajemba agi centre asembosa amenoktsü, iba sülen nüngdak apir centres tali lapoksemtsü, ta ashi.
UIDAI ajanga züngya 12 aliba biometric identification number, Aadhaar agütsür, aser tang tashi nung linük nung nisung crore 115 nem Aadhaar agütsüogo.