September 4 nü Party ajak nungi teshimtet teloki J&K semdangtsü

New Delhi/Srinagar, August 29 (Agencies): Union Home Minister, Rajnath Singh lenisüba nung party ajak nungi teshimtet telok kati September 4 nü Jammu & Kashmir semdangtsü, aser iba mapang nung parnoki Kashmir nübur aser lokti balala ajurua state nung tensa süngjemtsü atema o lemtepa lenmang bushitsü.
September 4 nü Home minister leniba nung teshimtet telok kati Jammu & Kashmir semdangtsü, ta Home Ministry otongdar kati metetdaktsü.
Yashi Home Minister-i BJP Tir, Amit Shah, Finance Minister, Arun Jaitley aser MoS for PMO, Jitendra Singh nunger den ghonda ka shi senden amendang party ajak nungi lenirtemi state semdangtsü atema o lemtepa liasü.
Osang angazükba agi, iba senden nungji teshimtet telok jagi nija aser telok shirnoksa ajurua jembitsü, iba atemaji o lemtepogo.
Ano külen J&K nung anogo 51 tashi Kashmir tesem aika nung curfew ozüng benoka aruba sülen anogo 52buba nung police station tesem asem dak alaka Kashmir Valley tesem ajak nung curfew agienogo.
“Pulwanma jila aser M R Gunj den Nowhatta kübok police station kar dak alaka Kashmir tesem ajak nung curfew agienogo,” ta police ketdangser kati ashi.
Tensa tajungba akumba ajanga item talenba ozüng agien, ta paisa ashi.
“Ajisüaka tzüzüng-ozüng benoktsü atema Valley nung lendong adoktsüsa aliba tesemtem nungbo security sepaitem maneni lemzükja lir,” ta pai metetdaktsü.
Kashmir nung anogo aika longkak aita longkak aitertemi sepaitem dak long agi ona raradang tajemba agi nisung 68 tashi süogo, asürtem rongnung police ana densema liasü. Iba dak alia nisung merirjang aika yiruogo.
Public garitem dak alaka tanep nungi tenzüka nija garitem aser auto-rickshaws gari lenmang nung senzüdar, ta ketdangseri ashi.
Sorkar office tem nunga mapa inyakertem longsoa aruogo aser bank tema lapokba ajanga nisung aika mapa jenti inyakogo.
Ajisüaka separatist teloktemi longkak aittsü ayonga aliba ajanga school, college aser tanga shisaliok rejutem aser dokantembo shibanga liasü.