Serena -i 6 buba Wimbledon takok marok agizükogo

America tsür Serena Williams (Abelen)-i Wimbledon tetsür singles shilem indang takok marok aser Spain tsür Garbine Muguruza-i tanabuba jenjang takok marok amer agiba noksa nung angur.

 London, July 11 (Agencies): America tsür Serena Williams-i Spain tsür Garbine Muguruza madak final asaya koka Wimbledon tetsür singles shilem indang takok marok tan agi 6 benbuba asoshi tanü Honibar nü agizükogo.

Arishi küm 33 ser anogo 289 tain Serena-i tanü points 6-4, 6-4 agi final asaya akokba sülen Martina Navratilova ajangteta tennis Open yimya nung asayatsü tenzükba sülen Grand Slam takok marok agizüker tetsür asayar tantsütila aküm.

Tetsür World No. 1 Serena-i US dollar sen million 2.7 senpet agizükba den külemi, 21 buba Grand Slam takok marok tanü agizük.

Serena-i taoba mapang, 2002-03 nung ajangzükba sülenbo tan mezüngsüa kasa küm nung Grand Slam takok marok 4 prongla agizüker tan tanaben akümer lir.

“Garbine-i tanü kanga junga asayaba yong ni asaya tembangba meteti asayatsüsa aküm. Tanübo ni takok marok agizükogo saka Garbine-ia kobi melii iba takok marok agizüktsü ta la dak tamang tulu akar,” ta Serena-i tanü takok marok agizükba sülen metetdaktsü.