Serena-i Auckland Classic akokba senpet tenla agütsü

Auckland, Aenjeti/January 12 (Agencies): Serena Williams-i Deobarnü WTA Auckland Classic final kokogo, aser lai asayama akokba atema senpet lemzükba ajak Australia nung morok mi agi kongshir alirtem nem tenla agütsüogo. Küm asem tsüngda tang mezüngbuba lai WTA asayamung ka koktetogo.
Iba Asayamung akokba ajanga iba ita Australian Open nung Williams-i takok tajung angutsü imlar. Lai iba asayamung kokra la Margaret Court-i Grand Slam titles 24 kokteter aliba den saku akümtsü. Deobarnü final asaya nung lai Pegula 6-3, 6-4 agi koka liasü.
Final akokba sülen arrshi küm 38 tain Williams-i senpet USD 43,000 agizükba ajak Australia nung morok mi tesashi agi kongshir alirtem nem teyari agütsütsü asoshi tenla agütsü aser ashiba agi, iba lendong timtem ajanga la dak kanga mejungi kongshiogo.
“Ni küm 20 dak tema Australia nung asayaa arudar aser Australia nung morok mi ajanga shiruru aser nisungtem, shirnok parnok talidak dena samaogo, parnok nem timtem tulu bener arutsüba osang news nung sayuba reprangtsü makoker,” ta Williams-i ashi
“Asayamung tenzükdang ni senpet tenla agütsütsü asoshi telemtetba agir liasü,” ta laisa ashi.
2017 küm tatemsa asayamung ka akokba sülen lai tang mezüngbuba asayamung ka kokogo aser tetsüka ama tang mezüngbuba asayamung koktetogo. 1999 küm mezüngbuba WTA asayamung akokba sülen lai küm tem tsüngda WTA asayamung 73 koktetogo.
Final nung mezüngbuba set nung Williams-i 1-3 agi Pegula memenepi liasü. Ajisüaka lai la indang range ngutetba sülen tajungba asaya tenzük aser asaya akok.
“Mapang talangka lir asayamung ka koktetogo aser ni anisüngzükba nenoki kü tejak nung reprangteta alitsü. Ni kanga jangradema bilemer; hopta peyong asayayonga aoba mapang ni tajungba akümer ama bilema liasü,” ta lai ashi.
Pegula-i tang tashi nung asayamung ka dang kokteta lir aser lai semifinal nung taoba world number one Caroline Wozniacki koka liasü, ajisüaka final nung lai Williams majangtet.