Serena-i Indian Wells director, Moore aitsür

Indian Wells, March 21 (Agencies): America tsür, Serena Williams-i Indian Wells tennis asayamong Director, Raymond Moore aitsüba olen ka yashi, Deobar nü metetdaktsüogo.
“Ni tetsür asayar ka asübo ni kü temokok agi ali nung apudaker Roger Federer aser Rafa Nadal nunger iba lima nung sodaktsüba atema Tsüngrem tenüng sangla kechiyong parnok aliba ajanga tetsürtemi tennis asayamong nung shilem agitsü maongka angur,” ta South Africa nunger arishi küm 69 tain Moore-i yashi osangbener den lemsatepa liasü.
“Tetsür shingaia ali nung apudaktsü nungdaka mali ta nibo bilemer. Moore-i sangoktsüba olenji tetsür tekübokba jenjang nung benshiba tashishitsü aketba olen ka lir,” ta taoba mapang Grand Slam takok marok 21 tashi agizükla, Serena-i kanga mepelai ashi.
Serena sema, tebur World No. 1, Novak Djokovic-ia Moore-i sangoktsüba olenji tim masüba olen ka lir ta metetdaktsü.
“Tebur aser tetsür bendanga benshiba ya saisapongtsü nung dang masü saka shishilembatsü sabang nunga angur,” ta shia, Victoria Azarenka-ia Moore aitsüogo.
“Ni aibelena jembiogo,” ta shia, tennis asayar ajunga aser Women’s Tennis Association (WTA) dang taidok meshiba olen ka Moore-ia tesülen metetdaktsü.
“WTA tentet ya tebur aser tesür naprongla kasa jenjang nung benshitsü tangatetba nung tentet. Aji oda, Moore-i tebur temaba jenjang nung benshia olen jembiba atema sasar,” ta WTA Tour Chief Executive, Steve Simon-ia metetdaktsüogo.