Serena-i Sharapova ajangteta sen timba aazüker asayar akümer

Los Angeles, June 07 (Agencies): Tawa tembangba French Open tetsür singles final asaya nung tamakok nguaka, America tsür, Serena Williams-i Russia tsür, Maria Sharapova ajangteta alima ajunga nung sen timba aazüker tetsür asayar akümba osang ka Forbes Magazine-i metetdaktsüogo.
Tetsür tennis asayar rong nung World No.1, Serena-i taoba ita 12 tsüngda nung ajak agi senpet sen dollar sen million 28.9 tashi aazüka, külem tennis asayar, Sharapova-i taoba küm 11 tashi abenba sen timba aazüker tetsür asayar jenjang ajangteta liasü.
Taküm January ita asayaba Australian Open asayamong nung ozüng alema meldonium mozü achiba ken o nung aibelenba sülen tang tennis masayadaktsütsü temerenshi agüja alila, Sharapova-i tanü tashi nung ajak agi dollar sen million 21.9 aazüka tanabuba jenjang nung lir.
America’er tetsür mixed martial arts asayar, Ronda Rousey-i ajak agi dollar sen million 14 tashi aazüka 8 buba jenjang nungi 3 buba jenjang tonga tuogo.
Ano, NASCAR gari toktepa anishir, Danica Patrick-i ajak agi dollar sen million 13.9 shi aazüka tang 4 buba jenjang nung lir.