Serena-i Sports Illustrated Sportsperson of the Year naroküm angur

New York, December 14 (Agencies): Nungtugu tennis asayar, America tsür Serena Williams nem 2015 Sports Illustrated Sportsperson of the Year naroküm tanü Hombar nü agütsüogo.
Tennis asayatsü tenzükba anogo nungi tanü tashi nung Grand Slam takok marok 4 prongla anaben tashi agizükla, Serena-i taküm 2015 küm asaya 56 nung asaya 53 tashi koka shilem agiogo.
“Serena-i la iba putu nung dang masü saka tennis otsü ajunga nung tennis asayar tajungtiba ta alima dang sayuogo aser iba yongji la nem Sportsperson of the Year naroküm agütsür, ” ta Sports Illustrated (SI) Group Editor, Paul Fichtenbaum-i metetdaktsü.
Arishi küm 34 tain Serena-i taküm 2015 küm piyong tetsür World 1 jenjang nung süidaktsü aser iba jenjang tajung ya lai taküm agi tanabuba küm atonga angur lir.
“Taküm küm takokba nung süidaktsüogo. Ni takok angutsü temulungtetba tulu yur bendanga agüja asayaba ajiteta Sports Illustrated-i kü nem iba naroküm agütsüba atema kanga pelar. Iba naroküm angüba ajanga tarutsü mapang nunga tali bendanga agüja asayatsüsa ni ajungmesor,” ta Serena-ia metetdaktsü.
Tesüiba mapang, 1983 nung toktepa asemer, Mary Decker-i anguba sülenbo asayar ka kijai iba naroküm agizüker mezüngbuba asayar Serena akümer lir.
Serena-i Australian Open, French Open aser Wimbledon densema tongti takok marok 5 tashi agizük saka la US Open asayamong semifinal nung tsükba ajanga lai calender-year Grand Slam alizüng metongtettsüsa aküm.
Serena-i tan iba naroküm anguba sülen Muhammad Ali (1974), Arthur Ashe (1992), LeBron James (2012), Micheal Jordan (1991), Billie Jean King (1972), Joe Montana (1990) aser Jack Nicklaus (1978) nunger den külemi iba nüngtugu naroküm agizüker asayar mongintem rong nung densemogo.