Serena-i Wuhan & China Open na nung shilem magitsü

New York, September 23 (Agencies): America tsür tennis asayar mongin, Serena Williams-i Wuhan aser China Open asayamong na nung shilem magitettsüsa akümba osang ka tanü, Hokolbar nü metetdaktsüogo.
“Kü tapubang yiruba sülen ni kanga timtema aliba yong ni Wuhan aser China Open na nung toktepa shilem magitettsüsa akümba osang sasaseta metetdaktsür. Ajisüaka, taruba October ita tatemlen Singapore nung asayatsü ayongba WTA Finals nungbo ni shilem agitsü renema lir,” ta World No. 2, Serena-i sangoktsü.
“Ni anogoshia terenemshiba agia aru saka kü tapubang tangasa asayamong nung toktepa shilem agitsüsa manepi aliba yong ni Wuhan o China Open na nung shilem magitsü lemtetogo,” ta arishi küm 34 tain Serena-i osang jangjashitsü.
Taoba mapang Grand Slam takok marok 22 tashi aigzükla, Serena-i taküm, 2016 küm tenzüker tanü tashi nung tennis asayamong 8 nung dang toktepa asayaogo aser lai bilemba ama shilem magitetba yong Germany tsür, Angelique Kerber-i la ajangteta tetsür World No. 1 kümogo.