Serena Williams 2016 Wimbledon semifinal-i iogo

London, July 05 (Agencies): Tetsür defending champion, Serena Williams-i Russia tsür, Anastasia Pavlyuchenkova madak takok ngua tang tasayadak 2016 Wimbledon asayamong tetsür singles semifinal asayatsü jenjang tanü, Mongolbar nü ajangzükogo.
Serena den külemi, teyi, Venus Williams; Germany tsür, Angelique Kerber aser Russia tsür, Elena Vesnina nungeri pei quarterfinal asaya koka semifinal asayatsü jenjang anguba osang jangjaogo.
Taoba mapang Wimbledon takok marok 5 ben tashi agizükla, America tsür, Venus-i points 7-6 (7/5), 6-2 agi Kazakhstan tsür, Yaroslava Shvedova madak takok ngua semifinal asayatsü jenjang angu.
Tan semifinal asayatsü jenjang anguba ya arishi küm 36 tain, Venus-i küm 7 tsüngda nung tan mezüngsüa Wimbledon semifinal asayatsü jenjang ajangzüker lir.
Ano, Czech Republic tsür, Martina Navratilova-i 1994 küm semifinal asayaba sülen Venus tetsür asayar rong nung semifinal asayatsü jenjang angur tanütsütila tanü kümogo.
Tan asayamong nung 4 buba jenjang abener, Kerber-ia points 7-5, 7-6 (7/2) agi Romania tsür, Simona Halep madak quarterfinal asaya koka semifinal asayatsü jenjang ajangzük.
Tan takok anguba sülen Venus aser Kerber na semifinal asayatsü lemzükogo.
Tesülen, taoba mapang Wimbledon takok marok 6 ben tashi agizükla, Serena-ia points 6-4, 6-4 agi Russia tsür, Anastasia Pavlyuchenkova ayong ayonga tsükdakja semifinal-i ai.
Tan semifinal asayatsü jenjang anguba ya Serena-i tanü tashi nung Wimbledon semifinal 10 buba asayatsü jenjang angur lir.
Serena sülen anidaka, Vesnina-ia points 6-2, 6-2 ngua tang asayamong nung 19 buba jenjang abener, Slovakia tsür, Dominika Cibulkova quarterfinal nung tsükdaktsü.
Serena aser Vesnina na tanabuba semifinal nung ajuruteptsü.