Seretlong Tozük Medemteptsüla (Tepong I)

~  Talitemjen Imchen.

Asenoki dokan balala nung shishitepdang ajaki seretlong shitak aginer. Seretlong shitak agizükba ji dang masü, tayoker nungi o tanep agi rajemtsüba aginer. Shir dokan-i talirtem molung chidaktsüdir item dokan jagi oa alitsü jangrateper. Shir dokan nung seretlong tozük shitak masü mesüra oset tamajung agütsüdir, item dokan jagibo kodanga moner. Aser lenmang nunga ajurutepdang aiben mejembinüi tezülen ajanga süiteptsü meranger. Iba jagi tanü shishilemaba tsütsü ji reprangdangra, tayoker-i junga mejembir memetet, oset tamajung agütsür memetet mesüra seretlong tozük shitak magütsür memetet, sen ?10 mesüra ?20 yong mechi noklang menden merijang menden nung nübu rongsen indoka, kima dokan tajung yutsür talangi oa shishitepba asen tenüki angur.
Tenük-i anguba agi seretlong shitak meshitak agütsüba ji meteter. Saka taküm ka ji seretlong aser oset shishiteper mesüka lir. Akümlir ajak asoshi dokan ka ka aser shishiteper ka ka lir. Nai shiba den jembidir telangzür ka ji dokan. Na mashi memetet ser küm nung tain ta bilema, asüküma langzüba jia asüngdanger jagi meteta lir. Ano alisa (python) ayak sayur ama, tangar-i shitak jembiyonga ano mabensa ta, tangar-i shitak inyak yonga parnokibo yamaiang inyak ta, tangar-i inyakba aser jembiba ajak nung achitetra, ner kidangi arutsübo doktsür, milungi ner kima jia mesüinütsü.
Ken mapang telok ka sangro zülur mali, dokan tajung ka bushitsü tenzük. Parnok nübu lemsar bushiba mapang, ozü dokan-i aru. Parnok dang sangro ya ni mezüludangar tangar kar nem dang zülujang ta ashi. Saka ni züludaktsünüba ji parnok tejangraba tulu liasü. Tatem nung ni hai ta nangzük. Iba sangro ji ni aonung pezü nü aser anüngdang pezü nü nung zülu. Sangro ji ni kodaka zülutetar kü shisatsü yari tajungtiba agi zülutsüogo ta, temolung süa bilemer parnok nem ji agütsü. Kenü ni ki kati ayaketa atu. Iba mapang parnok telok ji külemi mener, ni züluba sangro ji kati azüngba mapang liasü. Ni parnok nungi imlaa bilemba ji, na mapang kobika indoka zülu mesüra item onüktem yabo mangatetera to ta, kü sangro nungji asüngdangtsü asü ta bilem. Ano anogo pezü nü tashi ammang sangwa memeteti inyaker ji, shi tetsüng kabo agütsüdisü taa bilem. Saka iba mapang parnok ajak ji kanga mazüng. Kü den hi ta ashitsü jia mapang mali. Parnoki mezüluteti kü nem zülutsüba sangro nung to, iba nü jibo parnok ajak master kümer, iba olen ji indokang, hau iba olen jibo yamaiang melenshiang ta achiteta melenshitepbatem ji ni angu. Ni memeteti jet ta dang kü tenük nung nüksü atsüng. Ni parnok nungi koma pila aser koda ki atong tanü tashi ongko madoker. Saka aji parnoki ni asaa mezüngmeshiba masü, tanü kaket zülur aser Aor jenjang ji aika asoshi iba tia nung lir.
Shiti ta asünungbo item jibo oshioben (literature) tsütsü nütsüng dang lir. Saka osang kaket zülur aikati ocet olemsangpang nung agütsüdang, parnoki olasü (spelling) balala zülusatsür. Aser tesasatsü ka ji, onük nungji bendenloka zülusemtsür. Parnoki spelling melenshinüra tezülur den asüngdangteptsü tenüngdaktsü mesüra onük kar inoksema metongshinüra tezülur den tongteprateptsü tenüngdaktsü. Alima nung alir ajak tangatetbayim ya sasep ka ka dang lir. Tatishitsü (eg), nai tanü ocet nung onük talila mesüra spelling tajungba talila inoksemtsüba ji kü tenüng nung lir. Asüng alimai kü seretlong ji tuluka bilemer, item tajungtem ji kü dak imladang, ni makoktsü aser iba jagi kü taküm ji tamakoker ka kümtsür ta metettsüla.
Alima nung pei akaba ajak dangji RONGSEN ta ajar. Sen meimer-i sen ayanger. Sobaliba meimer-i sobaliba angazüker. Linük meimer-i linük tenzüker. Kongkikeno meimer-i kongkikeno yanglur amala (etc). Tatishitsü (eg), aikati Tongti Jaoker (Chief Quest) mesüra Tetoshi Jaoker (Guest of Honour) kati sen aika telok nung agütsüba dangji tenla tulu ta pelatepa teka madener. Saka lenla balala nungi tetenlar ajak ji kasa dang lir ta angatettsüla. Ao kin asoshi FATHER SCHOOL kanga saputepa arudar. Father school asoshi loken (anthem) ka kanga dang nüngdaka liasü. Saka sen meimer, sobaliba tajung meimer, linük tenzüker jenti nangdena yur, item rongsentem jagi father school loken bener marutet. Tatem nung SAMARO BAND ken zülur aser atener Wati Jamir-i yanglua mejemer, ken ji father school nem tenlaba ni angashi. Tetenlar balala jagi, ayako tena inyaktetba nungi tenlateper asünung, ajaki seret medema teka madentsü junger.