Sergey WBO, WBA & IBF heavyweight champion maneni akümer

Las Vegas, July 26 (Agencies): Russia nunger Sergey Kovalev-i France nunger Nadjib Mohammedi 3 buba round nung knockout (KO) süja maneni WBO, WBA & IBF heavyweight champion menden abentsü jenjang yasüng, Honibar aonung nguogo.
Las Vegas kübok Mandalay Bay hotel nung ayongba tsüngteptsü tetoktepba indang 2 buba round nunga arishi küm 32 tain Sergey-i Mohammedi laodaktsü ajanga alima ajunga dang pa temang touzük pound 175 taret shilem nung champion lir ta kuli sayua liasü.
3 buba round tenzüker minute 2:38 buba nung Sergey-i Mohammedi KO süja takokbaji ngutet.
Sergey-i tesüsa tsüngteper 12 rong nungi 11 tashi knockout sütsüba densema pai tsüngteptsü tenzüker tanü tashi nung tsüngteper 25 tashi KO süja lir.
Tanü tashi nung 37 ben tashi tsüngtepdang 4 ben tamakok anguba den külemi, 23 ben tashi KO süja alisang, arishi küm 30 tain Mohammedi-i züngdangba 9 tashi nung nokdak saka referee-i yasüng tsüngtepbaji anenja Sergey takoker kümdaktsü.
“Yasüng tsüngtepbaji tongti tetoktepba ka liasü. Ni takok ngua maneni champion akümtsü jenjang anguba atema kanga pelar,” ta Sergey-i metetdaktsü.
Sergey-i heavyweight shilem indang belt 4 prongla agizüktsü alizüng yua lir saka iba alizüngji ajangzüktsü asoshi pai WBC belt agizüka alisang, Canada nunger Adonis Steveson den takok ngua tsüngteptsü nungdaka lir.
Ajisüaka, Stevenson den toktepba tsüngteptsü asoshi jembiba osang tang tashi jangjateta mali.