Seven Slammers-i T20 Cricket Gold Cup agizükogo

Dimapur, October 27 (Agencies): Assam state nung tentetba Seven Slammers teloki final asaya nung Nagaland nung tentetba Brotherhood telok madak takok ngua, Twenty20 (T20) Cricket Gold Cup takok marok yashi, Bodbar nü agizükogo.
Dimapur kübok Sovima nung tentetba Nagaland Cricket Stadium nung agiba asayamong shibangba sentong nung Nagaland Angh, P.B. Acharya tongti tesemdanger liasü.
“Nagaland ya kentenmenü, jilushi aser iba amala sobaliba tajung aliba state ka lir saka nüburtemi saisapongtsü sabang nung tejakleni mera agitsü nungdaka kümogo,” ta tongti tesemdangeri metetdaktsü.
“Nagaland nung television news channel tentettsü nungdaka kümogo,” ta shia, iba amala osangbelenshitsü mapatong tentetba ajanga dang alimai asayartem dak aketba sempet tajungji ngua meteta akümtsü ta pai ashi.
Kasa sentong nung Nagaland Rural Development & REPA Minister, CL John-ia lanurtemi peipok mesütettsüsa cricket asayatsü tajungshiba olen ka lemsatep.
“BCCI TIR, Anurag Thankur-i tawa Nagaland Cricket Stadium semdangba ajanga Nagaland nung cricket jenjang tajungba akümba kuli tejangja angur,” ta Nagaland nungi Lok Sabha MP, Neiphiu Rio-ia metetdakja liasü.
Ano külen, Brotherhood asayar, Akash Kumar-i Best Bowler; Brotherhood nungisa, Amit Chopra-i Best Batsman; Brotherhood asayar, Abhinav Dizit-i Man of the Tournament aser final asaya nung Seven Slammers nungi Mukesh-i Man of the Match sempet agizükba densema, parnoki tan asayamong individual sempet aser takokba ajangzükba osang jangjaogo.