Seyie Auto-i Kohima nung Maruti Suzuki Arena lapokogo

Kohima, Rongchii/April 25, 2018: Tanü Pezielietsie,  Kohima nung Maruti Suzuki Arena semzükba sülen Maruti Suzuki India Ltd. ketdangsertem, Seyie Auto kibur aser NPF Tir, Dr Shurhozelie nunger külemi tangokba noksa nung angur.

Kohima, Rongchii/April 25 (TYO): State nüburtem atema Maruti Suzuki sabang tuluba lapokja tanü state yimtiba, Kohima nung tang mezüng Maruti Suzuki Arena lapokogo.
Kohima nung Maruti Suzuki Arena ya Commercial Head (East) of Maruti Suzuki India Ltd., Pankaj Prabhakar-i semzükja liasü.
Maruti Suzuki India Ltd. indang retail showroom ji Pezielietsie, Kohima nung lir aser iba ya Seyie Auto meyong lir aser Chief Executive Officer (CEO) ji Kuolachalie Seyie lir.
Showroom semzükba sentong nung jembidang Prabhakar-i, North East region nung Seyie Auto ya Maruti Suzuki Arena indang tajungtiba rongnung tanabuba jenjang nung lir, ta metetdaktsü.
Paisa, “Nüburtemi digital dang masü saka Maruti Suzuki indang ‘physical’-a ajangshitsü,” ta ashi.
Pai ashiba agi, Maruti Suzuki-i küm nung gari lakh 1.5 shi ayoker aser market share shilem 50% dang timba lir.
Iba sentong nung tetushi tejaoker o jembidang Nagaland Baptist Church Council General Secretary, Rev. Dr. Zelhou Keyho-i, terenlok, shishilembaba aser private sectors nung Naga nunger ano talangka lir, ta ashi.
Tesasaba olen ka nung pai, state jenjang anguba sülen küm 50 dak tema jungaka state nung mapa adokdaktsütsüsa functional industry mali, ta ashi.
“Asen lima nung tang tashi mapa meranga inyakba aser lang-a aliba senotsü mangur,” ta shia pai, Maruti Suzuki Arena ama bushiness amenokba ajanga Naga nunger nem teimla ka agutsütsü, ta ashi.
“Iba ya ajanga teimla ka agütsür, kechiyong asenoki nendaka aser ochishia inyakra Maruti Suzuki ama companies aser establishments-i asen state nung senotsü indoka inyaktsü,” ta pai ashi.
CEO, K Seyie-i, shishilembaba, industries aser aluyimba ajangaPezielietsie, dang Nagaland renloktsü, anungji chiyunga taküm alitsü aser rongsenkettsüng jenjang ajungkettsü atema lanurtemi shishilembaba maparen nung ajemoka inyaktsüla, ta ashi.
Faith Harvest Church Kohima nung senior Pastor, Rev Shan Kikon-i iba Arena meshiteta sarasademtsü. Iba sentong nung NPF Tir, Dr Shurhozelie Liezietsu, NDPP tatong Tir, Menuovilie Kesiezie aser First Class Contractor, K C Angami nunger densema tongtibang nisung aika aden.