Seyiejalie Naga Wrestlemania 4 lightweihgt champion kümogo

Naga Wrestlemania 4 lightweight shilem nung takok angurtemi asaya ketdangsertem den agiba arok noksa ka yangi angur. (Kohima, October 29)

Dimapur, October 29 (TYO): Kohima kübok Jotsoma nunger Seyiejalie Gwirie-i mezüngbuba jenjang ngua Naga Wrestlemania 4 (King of the King Series 2015) asayamong lightweight shilem indang champion tanü Brehostibar nü kümogo.
Gwirie-i final asaya nung Megovizo Visienyü tsükdaktsüba sülen champion belt aser kulikaket den külemi, senpet sen 50,000 agizük.
Kohima kübok Kiruphema nunger Megovizo-ia kulikaket aser senpet sen 30,000 agizüka liasü.
Semifinal nung shilem agitsü jenjang angur ana, Phek kübok Thipuzu nunger Vevotso Lase aser Thuvopisu nunger Tavesu Tetseo naprongla nem senpet 10,000 agütsü.
Tan asayamong mezüngbuba round nung shilem agitsü jenjang angur melangteper 26 densema tan temaba jenjang angur melangteper 4-i tan October ita 31 nü agitsü ayongba tatembangbuba tetoktepba shilem – King of the Rings Series nung shilem agitsü jenjang anguba osang ka tayonger, 3E Nagaland teloki tanü sangdong ka ajanga metetaktsüogo.
“Nagaland nung Naga nunger yimya nung melangteptsü tetoktepba ayongba atema 3E Nagaland telok dang pelar. Ano, lanurtemia tan amala melangteptsü tetoktepba balala nung shilem agiba ajanga pei sempet sayuba den külemi peipok mesütsüsa jenjang tajung ajangzüktsü ajungshir,” ta Nagaland Wrestling Association (NWA) Tir, Neikhrolo Khalo-i tanü sempet agütsüba sentong nung sangoktsü.
“NWA-i tanen makai Naga Wrestlemania takok ngua agitsüsa 3E Nagaland telok nungita yariba atema NWA dang pelaba lemsateper. Angami Sports Association (ASA)-ia ozü telok yariba atema par tentet danga pelaba lemsateper,” ta 3E Managing Director, Kethosituo Mepfhuo-ia metetdaktsü.
Ano külen, asüng, Hokolbar anepdang 10:00 ako nungi tenzüka iba asayamong indang tanabuba aser tasembuba shilem, Middleweight aser Heavyweight championship maneni asayatsü renema lir.