SF-10 commando temi Meghalaya nung Norrok kahset

Shillong (Meghalaya), February 26 (Agencies): Meghalaya, Special Force-10 commando temi telungpur lenir ka kahsetogo, ta Deobarnü police ketdangser kati metetdaktsü.
Meghalaya jail ketdangser ana tepsetba aser Assam nung tribal nisung tenet tepsetba ken otem nung Singbirth N. Marak, Norrok X. Momin ta ajasang police-i tebushidak liasü.
Pa ya taoba mapang United A’chik Liberation Army nung military wing tongti liasü, aser Honibarnü kahtepdang pa tepset aser par züngsem 4-5 shi yirutsüogo, ta police ketdangser kati ashi.
Raraba tesem nungjagi AK prangpong ka, pistol ka aser grenade ka ngutetogo.
Intelligence osang nung ajemdaker commando temi North Garo Hills district headquarters Resubelpara nungi kilometer 11 pilar aliba Matronggre arem mita ao.
“Telungpurtem jagi mezüng commando tem dak injang kahlokja iba rara tenzük,” ta district police chief, North Garo Hills, Dalton P. Marak-i osangbenertem dang phone ajanga metetdaktsü.
2010 küm East Garo Hills nung Williamnagar prisons nung ketdangser ana tepsetba aser 2013 küm Assam, Goalpara district nung Rabha kin nungi nisung tenet tepsetba atema sorkari pa nem temerenshi agutsütsü lemtetba mapang nungi Norrock jenshia liasü.
Norrok aser UALA Chairman, Novembirth Marak na den züngsem 68-i yaküm June ita nung prangpong aser injang bener sorkar matsüngdangi aruba sülen iba telok samaa liasü ajisüaka ano iba telok tentetshi.
Norrok tepsetba ajanga pai tasen tentetba United A’chik National Front telok tashi maittsü, ta Police ketdangsertemi ashi.
“Kahtepdang Norrok tepsetba ya onok (Meghalaya Police) atema takok tulu ka lir, kechiyong pa den telungpur tetsüti, William Sangma nati NDFB (National Democratic Front of Bodoland) telungpur teyari agia arrtsülen telungpur maparen inyaktsü sentong liasü,” ta Dalton-i ashi.
Police ketdangserisa, jena aoba telungpurtem aputsü atema operation tenzükogo, ta metetdaktsü.