Shah-i Guwahati semdangtsü; 2019 election atema tasa asatsü

Guwahati, Monupii (May) 4, 2018 (Agencies): 2019 Lok Sabha election atema North East Democratic Alliance’s (Neda) pur tasa asatsü asoshi BJP national tir Amit Shah Monupii (May) 20 nü Guwahati-i arutsü.
Neda ya 2016 küm Monupii (May) nung tentet aser iba tesem nung BJP aser parnok den longjemer aliba party tem atema sabang ka lir.
Assam BJP tir Ranjeet Kumar Dass-i Yangtepnü ashiba agi, Shah-i iba tesem semdangba mapang nung Neda senden nung shilem agitsü. “Pa lenisüba kübok northeast tesem nung NDA puri yimsü asüba state tem nungix chief minister tem senden agitsü,” ta Dass-i ashi.
Iba senden nung Neda convener aser Assam health minister Himanta Biswa Sarma aser tanga party lenirtem adentsü.
Tang Mizoram dak akala northeast nung state ajak nung Neda nung densema aliba party temi yimsüsüdar.
Metsüremi (March) nung Shah-i Assam semdangba mapang nung, 2019 general election nung Northeast nung menden 24 aliba nungi menden 21 bosa koktettsüba atema nükjidong aliba metetdaktsü.
2014 Lok Sabha election nung BJP puri iba tesem nung menden 24 nungi menden ti koktet.
BJP sangdong ka ajanga ashiba agi, iba Neda senden nung NE nung menden 21 koktettsüba atema tasa asatsü.
Dass-i ashiba agi, BJP state unit puri grassroots jenjang nung party inyakyim akangshitsü atema maparen balala inyak tenzükogo.
Paisa ashiba agi, iba inyakyim nung parnoki Assam BJP kübok pristha pramukhs (grassroots workers) lakh 3.33 shim tenzükogo. “Nalbari Assembly constituency nungbo pristha pramukhs 3,100 shimadokogo,” ta Dass-i ashi.
Pristha pramukh shia-i voter list nung page kaka achaayangtsü aser iba page nung aliba voter 60 den parnoki teti sendaktepa alitsü.
Dass-isa Monupii (May) 7 aser 16 tsüngda pristha pramukhs shimtsüba atema Mangaldoi parliamentary menden kübok booth-level senden, Assembly constituency ajak nung akatsü, ta ashi.
“Monupii (May) 22 nü Golaghat district kübok Sarupathar tesem nung tanga party tem nungi züngsem 5,000 dak temai BJP den senden ka nung shilem agitsü,” ta Dass-i shisem.
Paisa taruba party state executive senden Nalbari nung Monupii (May) 18 aser 19 nü akatsü, sangdong. “Assam nung BJP-i aniba sorkar küm ana ajungba aser Centre nung NDA sorkar küm pezü ajungba benjungmung, Assam kübok parliamentary constituency ajak nung Monupii (May) 24, 25 aser 26 nung akatsü,” ta Dass-i maneni metetdaktsü.