Shah minister kümdaktsüba opposition-i aitsü

Lahore, Metsüremi/March 30 (Agencies): Pakistan nung opposition party PPP puri Brig (retd) Ijaz Shah federal minister ka ama shimba atema sorkar aitsüogo, aser ashiba agi, kodaser taoba premier Benazir Bhutto tepsetba ken o nung aija alir ka Ato Kilonser Imran Khan-i pa indang cabinet nung züngoksemer.
Tir Arif Alvi-i Shah shimba agizükogo, shiba 2004 nungi 2008 tashi Intelligence Bureau (IB) tekolakba ama inyaka liasü.
Shah ya NA-118 Nankana Sahib nungi National Assembly züngsem ka lir aser pa Parliamentary Affairs, Federal Minister asütsü shimogo. Pa taoba military dictator General Pervez Musharraf sülen kanga temulung toka anidaker ka liasü.
Pakistan Peoples Party (PPP) Secretary Information Nafisa Shah-i ashiba agi, “General Musharraf yimsüsüba mapang Ijaz Shah ya yimden yimsüsüba tsütsü sendaka liasü. Benazir Bhutto-i email ka ajanga la tepsetra Ijaz Shah asadangtsüla ta shiogo.”
Laisa, Imran Khan-i aniba ‘puppet government’ ya General Musharraf yimsüsüba maneni tenzükshiba ka lir, ta ashi.
“Kodaser Ato Kilonser Khan-i taoba premier Bhutto tepsetba ken o nung aija alir ka pa indang cabinet nung züngoksemer. Iba ya nisung tepseter ka kümzüka ayuba den kasa lir,” ta laisa ashi.
PPP lenir Palwasha Khan-i ashiba agi, pa shibmba ya National Action Plan anema lir. Kechiyong kiralongrar nem teyari agütsür ka federal minister kümdaktsübaji iba sentong anema lir.
“Ijaz Shah minister ka ama shimba ajanga Imran Khan kechiba shim aji jangjaogo. Alima lenir Benazir Bhutto tepsetba nung aija alir ka mezüngbuba ashiokja shim aser tang minister kümdaktsüogo,” ta PPP Senator Saeed Ghani-i ashi.