Shah Rukh Khan arishi küm 50 jungogo

November 2, 2015: Bollywood nung ‘Badshah’ ta ajasang, Shah Rukh Khan tanü (November 02) arishi küm 50 jungogo.

Tanü Shah Rukh Khan asoba anogomung nung pai twitter ajanga pa film industry nung küm 25 ajungba osang lemsatepba den külemi tanü pa iba jangjang nung aliba ya pa sapurtem ajanga lir ta tepela lemsatepogo.

Shah Rukh-i twitter ajanga, “Ni asoba anogomung nung kü den temeim lemsatepba atema pelar. Taküm ya jangratemtsüka asütsü tai mebilemi liasü. Ajak dang pelar,” ta ashi.

Pa arishi küm 50 ajungbamung nung iba ya pa aser pa sapurtem naprong atema alizüng ka tongtetba tongtibang anogo ka ta rateta Shah Rukh-i pa indang taruba film ‘FAN’ indang tanabuba ‘teaser’ lemsatepogo.

Ano tanga osang ka nung interview ka agiba mapang Salman Khan-i, “Ni pa (SRK) taküm nung tajungtiba asoshi sarasademtsür. Pa aser par kibong anema alitsü, takok angutsü aser taküm nung tajungtiba ajangshitsü asoshi sarasademtsür,” ta ashi.

Bollywood nung Khan asem- Aamir Khan, Shah Rukh Khan aser Salman Khan nungeri küm aika film reprangertem jangratemdakja arudagi.

Salman-isa, “Onok ya tembar tajung lir. Shah Rukh Khan tesülen ang film industry-i ait. Mezüng Aamir Khan ait, iba sülen ni… Ajay Devgn, Akshay Kumar aser Shah Rukh Khan ait,” ta ashi.