Shah Rukh Khan aser Anushka Sharma na külemi shilem agitsü

April 02, 2016 : Anushka Sharma ya tang kanga mazüngi inyakba mapang ka lir. ‘Ae Dil Hai Mushkil’ film nung lai melangteper ama shilem agisang Salman den kanga anasatepa yariteper ka aser Ranbir Kapoor temshir ama shilem agia lir. Iba den külemi Imtiaz Ali-i yangluba film tasenba nung shilem agitsü asoshi renemdar. Osang kar ajanga ashiba agi, la dang iba film nung shilem agitsü asoshi asüngdang aser lai kanga mulunga agizük.
March 18, 2016 nü Mirror osang ajanga ashiba agi, Imtiaz Ali-i yangluba comedy film tasenba nung Shah Rukh Khan-i tekolak nung sü nair, Sikh nunger, raliwali nisung ka ama shilem agitsü. Film nung pa pei linüki meyipa arutsü atema nüburtem den jembishinüba nungji kangasa temününütsü keta lir.
Iba film ya tesadang ka London nung aser tesadang ka Punjab, India nung tangoktsü sentong lir. Film tenüng kechi ajatsüar ano melemtet.
Iba film ya Anushka tang tetangokdak film tem aser SRK-a Gauri Shinde-i yangluba romance drama film nung Alia Bhatt den shilem agiba ajak temer külenang tangok tenzüktsü.
Anushka Bollywood nung mezüngsüa shilem agiba film ji 2008 küm SRK den ‘Rab Ne Bana Di Jodi’ lir. Iba film nungji lai Taani Sahni ama shilem agia lir aser pei-i mulungba dang agir sorkar mapa inyaker Surinder den kibong akümba film otsü nungji angutsü.
Iba film nung shilem agir küm pezü sülen ano Yash Chopra-i yangluba  ‘Jab Tak Hai Jaan’ nung King Khan den külemi shilem agi. La iba film nungji Discovery Channel osangbener, Akira Rai ama shilem agiba ajanga la Best Supporting Actress, Filmfare Award angu.
Imtiaz-i yangluba film ya tena külemi shilem agiba film tasembuba alitsü.
Imtiaz denbo la tan mezüngbuba inyaktsüba lir ajisüaka tena küm pongu tashi khenbosa külemi inyaktsü jembia aruogo.
2011 küm tangokba ‘Rockstar’ film nung Anushka shilem agitsü asoshi tendangba nung shimteter la sübusolemtsü ajak asazüker lia Nargis Fakri ait.
Tan ang la dang Tamasha film nunga shilem agitsü asoshi asüngdang ajisüaka la mazüngba ajanga shilem magiteter.