Shahid aser Imtiaz Ali na taruba film nung külemi shilem agitsü

Mumbai, December 21 (Agencies): Küm ter tejakdang 2007 nung ‘Jab We Met’ film nung külemi shilem agiba sülen tang Shahid Kapoor film yanglur Imtiaz Ali den külemi longjemer inyaktsüba renema lir.
Shahid tang Shree Narayan Singh indang film “Batti Gull Meter Chalu” nung shilem agitsüba lir aser iba film yangluzükba sülen tena taruba küm nungi tenzüka film ka nung külemi shilem agitsü.
Imtiaz den maneni shilem agitsüba atema koda bilemer ta asüngdang dang Shahid-i ashiba agi, “Küna yakta külemi project ka nung shilem agitsüba lir, aser iba atema ni kanga yongyaa atar. Imtiaz ya kanga dang sempet aketba film yanglur ka lir. Küna prongla career tetenzüklen film ka nung külemi shilem agi aser iba ya nüburtemi tang tashi jembidar.”
“‘Jab We Met’ film ya kü asoshi kanga tongtibang lir aser Imtiaz den shilem agitsüba ya kanga jangratemtsüka asütsü, shiba mapa küm tem tsüngda nung ni kanga sakloka aruogo,” ta paisa ashi.
Shahid iba olen ya Zee Cine Awards sentong nung adenba mapang shia liasü.
Pai-isa ashiba agi, tang yanglutsü aliba film ya taoba film dang nung balaka lir.
Shahid ‘Batti Gull Meter Chalu’ film nung February 2018 nungi shilem agitenzüktsü. Iba film nung tetsür tongti shilem atema actor shimtsüba dak sendakba nung osang balala nung kanga bulua adoka liasü.
Osang ajanga ashiba agi, actor Katrina Kaif dang iba shilem agitsü asoshi mezüngbo asüngdang, saka tawa osang ka ajanga ashiba agi, Befikre actor Vaani Kapoor-i iba film nung shilem agitsü akok.
Iba film nung tetsürtem rongnungi tongtishilem agitsüba tenüngji hopta ka ana tsüngda nung sangdongtsü, ta paisa ashi.