Shakib Al Hasan-i Ian Botham indang record ajatetogo

Yimpoksüi/November 24, 2018 (Agencies): Küptoknü West Indies den mezüngbuba Test akokba asaya nung All-rounder Shakib Al Hasan-i England nunger nüngtugu cricketer Ian Botham-i yanglur aliba record ajatetogo. Shakib-i inning ana nung khen run 34 aser khen 1 yanglua liasü aser iba den wicket 5 agiogo.
Shakib ya Bangladesh nunger cricketer tem rongnungi wicket 200 agir mezüngbuba asayar kümogo aser iba den külemi Test asaya nung wicket 200 aser run 3000 takaratiba yangluteter asayar kümogo. Shakib-i iba alizüng ya Test asaya 54 nung tongtetogo koba Botham dang nungi asaya ka agi ishiba lir.
Test asaya nung wicket 200 aser run 3000 takaratiba yangluteter asayar pongu yamai alitsü:
54 – Shakib Al Hasan (BAN)
55 – Ian Botham (ENG)
58 – Chris Cairns (NZ)
69 – Andrew Flintoff (ENG)
73 – Kapil Dev (IND)
Zimbabwe den Bangladesh nung asayaba nung yiruba ajanga Shakib masayateti liasü, aser Rongjui/Sept nung pa temeyong surgery agiba sülen pa ita asembosa masayatettsü ta tsübua liasü.
Ajisüaka Bangladesh chief selector Minhjaul Abedin-i ashiba agi, Shakib komo imlaba dang nungi takaraba anep, aser ibayongji pa West indies den mezüngbuba asaya nung shilem agitsü asoshi shim.
“Pa physio-i West Indies den asayatsü asoshi temelaba agütsüogo,” ta Minhajul-i ashi
“Pa temeyong nung tashiba kecha mali aser pa mezüngbuba Test nung asayatettsü. Pa practice aika nungbo maden saka asayar tejen asünung pai asayatettsü ta onoki bilem,” ta paisa ashi.
Team ana tsüngda tanabuba test Yimpoksüi/November 30 nü nungi tenzüka Shere Bangla National Stadium, Dhaka nung asayatsü.