Shamator nung apuani tepsetba ken o nung nisung 3 apu

Dimapur, March 13 (TYO) : February 6, 2016 nü Shamator Sub-Division kübok Yeyi Bridge anasa apuani- asür Alemba Sangtam aser asür Narola na tepsetba ken o bushisüngdangtsü atema February 17, 2016 nü Special Investigation Team (SIT) ka tenteta mapa nungloktsü.
DIG jenjang nung ketdangser kati lenisüba SIT teloki bushisüngdangba maparen jenti inyakogo aser parnoki Kiphire o Tuensang district kübok meta talangka pilar aliba yimtsüngtem sema senzüogo, ta Tuensang Superintendent of Police, R. V. Ezung-i sangdong ka nung metetdaktsü.
March 9, 2016 nü local Police aser NAP (IR) sepaitem teyari agia SIT teloki Shamator Sub-Division kübok tesem kar nung bushisüngdanga aodang, apuani tepsetba ken o nung shilem agir nisung asem apu, ta Tuensang Superintendent of Police-isa sangdong nung shia lir.
Par asemji tang police ket nung lir aser parnok dang asüngdangya tesüdak lir. Tang tashi nung parnoki kuli tejangja kar agütsüogo aser item kuli nung ammeter bushisüngdangertemi mapa tajungba inyakteta odar, ta paisa sangdong nung metetdaktsü.