Shamator nung ki ana rongdoktsü, kaketshir ana yiru

Kohima, Feb 9 (NEPS) : Taoba Honibar aonung Shamator o Kiphire town na tsüngda apuani na mejangjatetba nisung kari khasetba sülen atalokba lendong agi Shamator town tongogo aser iba lendong nung tanü Mongolbar nikongdang Shamator town nung lanurtem kar ain adoka orr ki ana rongdoktsüogo.
Iba ki rongdoktsüba dak aketba maparen nung IRB sepaitemi lanur 21 pua ayu. Iba osangji angashia ano lanur aika telong dener sepaitem anema aru, anungji parnokji nokdanga injang yokdang kaketshir asem yirutsü.
Par asem rongnung aiür chanu ka densema liasü aser teyirurtem rongnungji Class X nung azünger nisung ka tenüng agi Richard kanga mejungi yirua lir ta angazüker. Pajibo Shamator nungi tangaleni bener ogo.
Tanü nikongdang iba lendong atalokba sülen Shamator town-i IRB sepai company ana yokogo.
Kiphire town nung tang tashi CrPC 144 agüja lir. Iba osang zülu tashi nungbo Kiphire aser Pungro lenbo timtem lendong atalokba osangbo mali asü.
Taoba Honibar aonung mejangjatetba nisung kari Shamator Sub-division kübok Rurrue yimtak Mongshike Project area nung nisung ka tenüng agi Alemba Sangtam aser pa kinungtsü Narola na khaset. Tena temangji tananep dang angu aser iba osang prokshiba sülen Kiphire town nung lendong ataloka liasü. Iba lendong nung MLA, Torechu’er kia raksatsü. Ano, tananüa Pungro nung nisung kari ki kar raksaja lendong atalok.
Iba osang züludang angazükba agi, apuani khasetba maparen bushisüngdangtsü asoshi state sorkari Inquiry Commission ka shimogo aser asür kinunger ka nem sorkar mapa agütsütsü nangzükogo.Ano, state sorkarisa asür kinungertem nem teyari sen lakh ka agütsütsü lemtetogo.