Shane Watson test cricket nungi anisüngzükogo

Melbourne, September 6 (Agencies): Australia nunger cricket nung all rounder tejen, Shane Watson-i Deobar nü pa test cricket nungi anisüngzükba osang metetdaktsüogo.
Arishi küm 34 tain, Shan Watson ya Cardiff nung Ashes asayadang Australia-i runs 169 agi England makokba asaya nung tatemsa test asaya liasü.
Watson iba asaya nung Australia asoshi mezüng batsman ia liasü aser ball 19 nung runs 30 yanglur out asü. Iba asaya nung pai wicket ka danga magitet.
Pa test asaya nungi anisüngzükba osang Cricket Australia meyong official website ajanga sangdong.
“Iba telemtetba agitsüji kanga temela masü saka ni ODI aser T20 nung bendanga agüja asayatsü mapang tajung ta meteta aruogo” ta pai ashi.
“Ni, ozü kibong aser team atema koba tajungba asütsü ta bilemdangdang kü shisatsü kanga animesüngzükteti aküm, ajisüaka anogo ana tejaklen nungi ni team nem kü tajungtiba agütsüogo ta shisateta aruba sülen iba telemtetba agia liasü” ta paisa ashi.
Watson ya test asaya ka aser ODI tuko nung captain süa aruogo saka pa temola nung timtem aliba ajanga Deobar nü Lord’s nung ODI asaya nung medentet.
Watson-i tang tashi nung Australia asoshi Test asaya 59 asayaba nung runs 3,731 yanglua lir aser wicket 75 agiogo.