Shanghai nung BRICS Bank tentetogo

China kübok Shanghai yimti nung New Development Bank ta ajaba BRICS Bank tasen lapokba sentong nung Shanghai Mayor, Yang Xiong (Achiji), China Finance Minister, Lou Jiwei (Tiyongtsü) aser K.V. Kamath, Tir, New Development Bank (Abelen) nungeri tanü Mongolbar nü shilem agiba noksa ka yangi angur. (Shanghai, July 21)

 Shanghai, July 21 (Agencies): Brazil, Russia, India, China aser South Africa densemba BRICS teloki China kübok Shanghai yimti nung New Development Bank (NDB) tanü Mongolbar nü lapokogo.

World Bank ama alima jenjang nung tongti shilem agiba senotzü benshidak den toktepba inyaktsü nükjidong nung BRICS teloki tan agi tanabuba BRICS bank lapoker lir.

BRICS teloki Asian Investment Infrastructure Bank (AIIB)-a Beijing yimti nung taoba June ita lapokba osanga bushitetogo.

“Alima jenjang nung tentetba senotzü benshidak balala den toktepdaktsütsü alizüng ayuba den külemi, ozü BRICS züngsemtem indang senotzü jenjanga tajungba kümdaktsütsü nükjidong nung NDB ya tanü lapokogo,” ta NBD Tir, Kundapur Vaman Kamath-i metetdaktsü.

2012 küm nungi tenzüka nungdakba maparen inyaktepba sülen tanü lapokba NDB indang senpong nung dollar sen billion 50 yutsüogo aser küm ishika tsüngda nung senpong nung senji billion 100 dak tema kümdaktsütsü alizüng yua lir.

China-i NDB senpongi dollar sen billion 41; Brazil, India aser Russia nunger shiai sen billion 18 aser South Africa-i sen billion 5 tashi NDB senpong nung inoktsütsü nangzüktepa lir.