Sharapov-i Qatar Open nung shilem magitettsü

Moscow, February 10, (Agencies): Tesüiba tetsür World No. 1, Maria Sharapova-i tan February ita tatemlen asayatsü ayongba Qatar Open tennis asayamong nung shilem magitettsüsa akümba osang ka asayamong tayongeri tanü, Bodbar nü metetdaktsüogo.
Taoba mapang Grand Slam takok marok 5 tashi agizükla, Sharapova teka abelen yirua America tsür, Serena Williams nem quarterfinal asaya kokdakja Australian Open nung shilem agiba sülenbo lai tanü tashi tennis toktepa masayai lir.
Netherlands teloki Russia madak takok ngua asayba Fed Cup quarterfinal nunga Sharapova-i shilem magi süidaktsü.
“Kü teka tangasa junga manepi aliba yong ni Qatar Open nung shilem magitettsüsa akümer,” ta arishi küm 28 tain Sharapova-ia metetdaktsü.
Russia tsürla, Sharapova-i 2005 aser 2008 küm Qatar Open takok marok agizükba den külemi, lai tesüsa, 2013 küm Qatar Open asayamong nung semifinal tonga shilem agia liasü.
Tan February ita 21-27 nü tashi assayatsü ayongba Qatar Open asayamong takok angur nem senpet sen dollar sen 2,517,250 agütsütsü renema lir.