Sharapova aser Venus na nem Cincinnati Masters atema wildcards agütsü

Washington, Chiteni/July 30 (Agencies): Taoba mapang world number jenjang tongteter alir, Maria Sharapova aser Venus Williams na nem taruba ita WTA Cincinnati tournament atema wildcard entries agütsüogo.
Tenaprongla August 12 nungi 18 tashi asayatsü aliba asayamung nung shilem agitsü.
Sharapova ya career Grand Slam tembanga kokteter asayar trok rongnung densema lir. Arishi küm 32 tain asayari WTA titles 36 aser Grand Slam pongu koka lir aser tang jenjang 81buba nung lir. Lai 2014 küm tatemsa French Open Grand Slam title benogo.
La tapu yiruba ajanga ita pezü shi masayai aru aser Wimbledon nunga mezüngbuba round asaya set asembuba nung masayateti tuguadok.
Sharapova-i 2011 küm Cincinnati title koka lir aser 2014 küm kasa asayamung semi-finals nung tsüka liasü.
Kasa mapang nung arishi küm 39 tain Williams-i Grand Slam titles tenet aser WTA title 49 koka lir aser laisa Grand Slams teku nung tanabuba jenjang nguteta lir. Jenjang 51buba nung alila US tsürlai 2000 Sydney Olympics kija asaya nung gold medal koktetogo aser tenu Serena den Olympic doubles titles asem tashi kokteta lir.
Küm 25 tashi asayaa aruba mapang iba asayamung ya Venus asoshi Cincinnati asayamung tenetbuba asütsü. Lai iba asayamung nung 2012 küm semifinal tonga asayadanga lir.
“Maria aser Venus na ya tennis puti otsü nung asayar tajungtiba rongnung densema lir,” ta tournament director Andre Silva-i ashi.