Sharapova-i 2020 Olympics nung shilem agitsü akok

Moscow, January 05 (Agencies) : Russia nungi nüngtugu tetsür tennis asayar Maria Sharapova-i Russia tenüng nung Tokyo nung akatsü aliba 2020 Olympics nung asayatsü akok, ta Russian Tennis Federation nung Tir Shamil Tarpishchev-i ashi. April 26, 2017 nü nungi Russia tsür Sharapova tennis asayatsü temelaba angutsü, ta Tass osang ajanga ashi.
“Sharapova-i 2020 Olympics nung Russia team nungi asayatettsü aser temaba jenjang ngutettsü akok. Saka aji la mulung tang lir,” ta Tarpishchev-i Bodhbarnü metetdaktsü.
“April nung Sharapova tournament nung shilem agitsü asoshi arutsü. Lai temaba jenjang nung asayatsü asoshi imla atar. Saisapongba ajak kanga karaa tejakleni aoer saka la takotet asayar ka lir aser ajakji latak tang keta lir,” ta pai shisem.
March ita tetenzüklen Sharapova ya mezüngbuba süa, saisapong mapang tashi agütsüba ‘Meldonium’ mozü la temang nung keta aliba osang sangdong. Iba sülen tamalen World No.1 asüla Sharapova ya tennis asaya dak sentakba maparen ajak nungi anenja liasü.
Anti-doping ozüng nung ajemdaker International Tennis Federation (ITF) Tribunal ajanga June 08, 2016 nü nungi tenzüka la küm ana tashi tennis asaya nungi anentsüba anema lai Court of Arbitration for Sports (CAS) ajanga June 09 nü iba ken-o khen jembishitsü asoshi temepishiba ka agüja liasü.
October ita nung CAS-i ken-o angadangba sülen tamalen agüja aliba ozüng yanglushija April 26, 2017 nungi lai tennis asayatettsü temelaba agütsü.
Asaya nungi nokdangba ajanga, 2012 London Olympics nung Silver medal angulai 2016 küm Brazil nung aliba Rio de Janeiro nung Summer Olympics Games nung shilem magitet.