Sharapova-i ozüng alema mozü mora achiba osang bushitetogo

Alima ajunga nung tetsür asayartem rong nung sen timba aazükla, Russia tsür Maria Sharapova-i US kübok Los Angeles nung tentetba The LA Hotel Downtown nung osangbener den ajurutepa lai alibelenba nangzükdang agiba noksa ka yangi angur. (Los Angeles, March 08)

Los Angeles, March 08 (Agencies): Russia’er tetsür tennis asayar mongin, Maria Sharapova-i ozüng alema tashi tali aitsü Meldonium mozü chia aibelenba olen ka yashi, Hombar nü metetdaktsüogo.
Taküm, 2016 küm tetenzüklen Australian Open asayadang agiba tetendangbaren nung lai iba tashi tali aitsü mozü achiba osang bushiteta tan March ita 12 nü nungi tenzüka la den sentakba bushisüngdang metembang tashi la tennis asayatsüren nung shilem magidaktsüi nokdangtsü renema lir.
“Ni ozüng alema Meldonium mozü chia aibelenba ajanga ni pusemer aser nungiter ajunga tezüdangdaktsüogo aser iba atema ajak dang taidok meshir,” ta taoba mapang Grand Slam tennis takok marok 5 ben tashi agizükla, Sharapova-i metetdaktsü.
Mapang shia temulungjang timtem ajuruba aser diabetes tashidak nungi kümzüka alitsü densema, timtem balala nungi kümzüka alitsü atema lar doctor-i ajungshiba ama, lai 2006 küm nungi tenzüka Meldonium mozü achiba olen ka lai lemsatepa liasü.
Meldonium mozü ya taoba mapangbo asayartemi achitsü nokdangba mozü tarensen nung meinoksemi liasü saka 2016 küm nungi tenzüka World Anti-Doping Agency (WADA)-i iba mozü ya nokdangba mozü tarensen nung inoksemba osang jangjaogo.
Sharapova-i meldonium mozü achiba osang taküm January ita 26 nü bushitetba sülen la dang iba osangji tan March ita 2 nü metetdakja liasü.
“Ozüng alema mozü mora achir asayar nem küm 4 tashi asaya nung shilem magidaktsüi merenshitsü lateta lir saka jembitepba ajanga iba temerenshiji ajemtsütsü imlar,” ta Sharapova’er okatsür, John Haggerty-ia metetdaktsüogo.
Tan adokba ken o nung Sharapova aija la merenshira, lai taküm August ita asayatsü ayongba Rio Olympics nung lar Russia tenüng nung shilem magitetsüsa jenjang tamajung ajurutsü.
Ano külen, Sharapova-i aibelenba osang angazükba sülen Switzerland nung tentetba anütetsü yanglur telok, TAG Heuer; saisapongtsü osettüset yanglur, Nike aser Germany nung tentetba gari yanglur telok tongti, Porsche nungeri arishi küm 28 tain Sharapova den tesendaktep kecha mayutsü lemtetba osang alima dang sangoktsüogo.