Sharapova-i WTA Finals nung shilem agitsü jenjang angur

Singapore, September 11 (Agencies): Russia tsür Maria Sharapova-i Singapore nung asayatsü ayongba küm tatemlen asayaba WTA Finals nung taruba October ita shilem agitsü jenjang tanü Hokolbar nü ajangzükogo.
Tetsüng yiruba ajanga tang New York yimti nung tasayadak US Open 2015 asayamong nung shilem magitettsüsa akümla, Sharapova-i WTA Finals asayamong nung tan agi 8 ben buba shilem agitsü jenjang angur lir.
Tetsür World No. 3, Sharapova-i mezüngsüa shilem agiba WTA Finals takok marok 2004 küm agizükba den külemi, lai 2007 aser 2012 na densema WTA Finals nung shilem agitsü jenjang 3 ben tashi ngua lir.
“Sharapova-i 2015 WTA Finals nung shilem agiba ajanga la pusemertem kanga dang peladaktsütsü,” ta Stacy Allaster, WTA Chairman & CEO-ia metetdaktsüogo.
Arishi küm 28 tain Sharapova-i WTA Finals nung shilem agiba jakdang Tokyo, Wuhan aser China Open asayamong nung shilem agitsü sentong renema lir.
Tetsür World No. 1, America tsür Serena Williams aser World No. 2, Romania tsür Simona Halep natia taruba October ita 23 nü nungi November 1 nü tashi asayatsü ayongba WTA Finals nung shilem agitsü jenjang ngua lir.