Sharapova nem o bendang taküm October ita agütsüshitsü: CAS

Lausanne, September 13 (Agencies): Russia’er tetsür tennis asayar mongin, Maria Sharapova nem agütsüba küm 2 tashi tennis asaya nung toktepa shilem magitsü o bendang reprangshitsü den sentakba o bendang taküm October ita tetenzüklen agütsüshitsü renemba osang ka Court of Arbitration for Sport (CAS)-i tanü, Mongolbar nü sangoktsüogo.
Taküm January ita Australian Open asayamong asayadang arishi küm 29 tain Sharapova-i ozüng alema tali tashi itshitsü meldonium mozü achiba kuli ngutetba sülen International Tennis Federation (ITF)-i la nem küm 2 tashi tennis masayatsü temerenshi agütsü saka la nem agütsüba temerenshi tanaben reprangshitsü atema Sharapova-i CAS nung onük benok.
“Sharapova aser ITF na tsüngda adokba ken o taküm October ita tetenzüklen angadanga o bendang agütsüshitsü renemogo,” ta CAS-i sangdong ka ajanga metetdaktsü.
La den sentakba ken oji taküm July ita 18 nü tashi nung angadangtsü atema mezüngbo lemtetba yong Sharapova-i taoba August ita asayaba 2016 Rio Olympics nung lar Russia tenüng nung toktepa shilem agitsü alizüng yua liasü.
Alima ajunga nung asayartemi ozüng alema mozü mora achiba tendanger, World Anti Doping Agency (WADA)-i meldonium mozüji ozüng alemba mozü tarensen nung taküm January ita 1 nü densemdaktsüba osang bushitetogo.
“Ni taneptsü bushia meldonium mozü küm 10 shi chia aruogo. Ajisüaka, iba mozü ozüng alemba mozü tarensen nung densemba osang memeteti liasü,” ta taoba mapang Grand Slam takok marok 5 tashi agizükla, Sharapova-ia metetdakja liasü.
2004 küm Wimbledon takok marok agizüka, alima ajunga nung nungtugu asayar akümla, Sharapova-i tanü tashi nung WTA singles takok marok 35 tashi agizükba den külemi, lai senpeta dollar sen million 36 dak tema aazükba osang bushiteta lir.