Sharif-i Nuclear plant tasen yanglutsü maparen tenzüktsüogo

Pakistan Ato Kilonser, Muhammad Nawaz Sharif-i Karachi yimti nung yanglutsü renemba KANUPP-2 nuclear power plant tasen yanglutsü maparen tenzükja ozülu salatsüba noksa nung angur. (Karachi, August 20)

 Karachi, August 20 (Agencies): Pakistan Ato Kilonser, Mohammad Nawaz Sharif-i Pakistan kübok Karachi nung nuclear power plant tasen ka yanglutsü maparen tanü Brehostibar nü tenzüktsüogo.

Light tashi agi kanga anünga aliba Pakistan linük nem light tashi megawatts 1,100 agütsüsemtsü nükjidong nung China-i nungdakba dollar sen billion 10 tashi agüja yaritsü nangzükba sülen Sharif-i tanü power plant tasen yanglutsü maparenji tenzüktsür lir.

“Ozü Karachi yimti nung Karachi Nuclear Power Plant II (Kanupp II) mesüra K-2 ta ajaba power plant tasen yanglutsü maparen asangsang nung tenzükba ajanga ozü Pakistan aser China na tsüngda tesendaktep tajung aliba kuli sayur. Aji oda, China sorkari ozü Pakistan den mapang shia yaritepba atema pelaba lemsateper,” ta Sharif-i tanü sentong nung metetdaktsü.

China nungi teyari agia Pakistan-i küm 43 tejaklen yangluba Kanupp (Karachi Nuclear Power Plant) anasa K-2 aser K-3 ta ajaba nuclear power plant tasen 2 tashi yanglutsü sentong renema lir.

“K-2 nuclear plant yanglutsü lung 2013 küm November ita azüngba sülen kasaji takok ngua yanglutsüsa nungdakba maparen nendaka inyakba atema Pakistan Atomic Energy Commission (PAEC) danga kanga pelar,” ta Sharif-i tanü sangoktsü.

K-2 yanglutsü maparen tenzükba sülen China nungisa teyari agia light tashi megawatts 1,100 agütsütetba K-3 nuclear plant yanglutsü maparena tenzüktsü sentong renema lir.