Sharif US-i aoba ajanga US den tesendaktep ulushitsü imlar

Islamabad, October 19 (Agencies): Pakistan Ato Kilonser Nawaz Sharif Hombar nü US-i anogo asemnü atema ogo aser iba mapang Obama-i aniba yimsüsürtem den senden aika akatsü tebilemba lir.

Pakistan ketdangser kati ashiba agi, tan pa Barack Obama den ajurutepba mapang India den mepetmesü aser Afghanistan den yimjung yangluba tsütsü süoka jembitsü. Iba den külemi Washington (US yimtiba) dang rongsenkettsüng aser linük wazüka ayuba tsütsü teyari meshitsü.

Ketdangserisa, “Ato Kilonser Nawaz Sharif-i US Tir Obama den linük ana tsüngda rongsenkettsüng aser defence tsütsü amalitepa inyaktsü aser Afghanistan o India den mepetmesü tebilemtsü lemsateptsü,” ta ashiba Samaa News ajanga metetdaktsü.

Sharif-i Pakistan linük rangben nung security tashi itshitsü ken o-a süoka jembitsü, ta paisa shisem.

Sharif-i October 21 nü US nung tongtibang company tem indang CEO tem aser investor tem senden nung o jembitsü. Iba mapang pai Pakistan nung renema aliba investment sentongtema lemsateptsü.

US Chamber of Commerce aser US Pakistan Business Council nati iba sentong nung investor 200 den CEO tem adentsüsa renema lir.

Sharif-i tang US semdangba mapang US Senate aser US Congress den Senate nung mendenbuba aser House Foreign Relations Committee tema ajurutsü sentong lir.

Iba den külemi ano US Secretary of State, John Kerry, treasury secretary, secretary defence aser tanga secretary temia pa jaoka senden amentsü tebilemba lir.