Sharingain Longkumer-i NLA Speaker inyaktsü

Kohima, February 7 (TYO): Hokolbarnü Nagaland Legislative Assembly (NLA) nung Speaker inyaktsü atema People’s Democratic Alliance candidate Sharingain Longkumer-i takok nguogo.
Arishi küm 38 tain Sharingain ya Mokokchung district kübok 26 Aonglenden Assembly Constituency nungi MLA lir.
Pai opposition Naga People’s Front (NPF) candidate aser taoba Speaker Dr Imtiwapang Aier madak takok angu.
Assembly indang Chairman NDPP MLA Dr Neikiesalie Nicky Kire lenisüba kübok tanü Speaker indang election agidang MLA 57-i shilem agi. MLA temji PDA nungi 32 aser NPF nungi 25 liasü.
Taoba Speaker Vikho-o Yhoshu aser 60-Pungro Kiphire constituency nungi NPF MLA T Torechu na asüba ajanga assembly menden ana tazüng lir.
PDA nung dena aliba NDPP, BJP aser Independent MLA ajaki Sharingainnem vote enoktsü aser NPF MLA 25-i Dr Imtiwapang nem enoktsü. NPF MLA 25 rongnung tenetbo party nungi anenja lir, saka Assembly nung parnok Party whip agi alena aliba agi parnoki Dr Imtiwapang nem vote enokja liasü.
Chief Minister Neiphiu Rio-i Speaker tasen Sharingain nem tenüngsang agüja jembidang “Sharingain ya tang mezüng MLA ka asüyonga, pai taoba ita ishika Deputy Speaker aser Speaker in Charge mapa kanga junga inyakogo” ta ashi.
Linük nung assembly tajungtem rongnung NLA ya ka lir ta züngshir aser kümtem süia arudang, Nagaland MLA temi kanga dang shisa kaa inyaksangshia arur. Anungji, inyaka aruba ama Speaker-i NLA indang sobaliba tajung nung ammettsü aser sendentem timi len ania aotsü ayongzüker, ta Rio-isa ashi.
Sorkari Speaker den yariteptsü aser Speaker-ia teti Constitution of India nung ajemdaker ochi obendang aser temeten agütsütsü imlar, ta Chief Minister-isa shisem.
NLA nung Opposition lennir T R Zeliang-ai Speaker Sharingain nem tenüngsang agütsüdang “ozüng shia meteter lanur ka Speaker inyakba atema kanga pelaa bilemer” ta ashi.
“Assembly nung tematiba menden nung shimba ama, onoki nai iba menden akhümket meraksai inyaktsü imlar aser amanger. Speaker tasenbai tejak mereprangi inyaksangshitsü ta Opposition bench-i imlar” ta Zeliang-isa shisem.
“Timi aser tejak mereprangi inyaksangshi tashi onoki amalitepa yariteptsü” ta paisa shisem.
Assembly nung tanubosang süaka pa nem iba maongka agütsüba atema pelar, ta Sharingain-isa o tepela o jembidang ashi.
Speaker indang election nung opposition bench-ia democracy tangatetba nung shilem agiba atema pelar, ta paisa shisem.
“Iba ya tetushi ulura lir aser ano tebilemtsü dena lir. Ni Speaker menden akhümtsübua inyaktsü” ta Sharingain-isa ashi.