Sharmila anema ken o agientsüla: Amnesty International

Kolkata, July 27 (Agencies): Meimchir temeten atema inyakba International tentet, Amnesty International-i Manipur sorkar dang, Irom Chanu Sharmila-i küm 16 lumia aruba August 9 nü metembangdangsa la anema benokba ken o tem agienang, ta takhangba agütsüogo.
Sangdong ka ajanga Amnesty International-i, state sorkari tangsa telatetba kecha makai arishi küm 44 tain Sharmila chioktsüla aser la anema benoka aliba ken o ajak agientsüla, ta ashi.
Amnesty International India Project Manager, Arijit Sen-i, Mongolbarnü Sharmila-i la telemtetba sangdongba ajanga lai Armed Forces (Special Powers) Act (AFSPA) anema raraba ya lenmang tasen ka nung aotsü, ta ashi.
Amnesty International-i la ya “Prisoner of Conscience” lir, kechiyong la lumiba atema apu, aser police-i ibaji peisasa soseta asütsü merangba ka lir ama reprangtet, ta jembia lir.
“Tesüiba küm 20 tsüngda Manipur nung ozüng alema nisung tepsetba ken o 1,528 bushisüngdangtsü atema  Supreme Court-i tuyuba mapang ka nung iba ya ataloker. Joko tangbo sorkari parnok shilem inyaka AFSPA agientsü atema lenmang lapoktsütsü nüngdaker,” ta Sen-i ashi.
Mongolbarnü Manipur “Iron Lady” ta ajala, Sharmila-i, la lumiba August 9 nü tembangtsü aser kibong akümba sülen election nung toktepa yimtenren ajanga AFSPA agientsü atema raratsü, ta sangdonga liasü.
Sangküm Manipur Assembly election nung lai Malom constituency nungi Independent candidate ka ama tokteptsü.