Sharmila-i Imphal CM, Ibobi’er jila nung election nüboyim

Imphal, February 12 (Agencies): Meimchir temeten atema nokdaker, Irom Sharmila-i cycle nung Manipur assembly election atema kanga mazüngi nüboyimdar.
State aika nung yimtenren lenirtemi election nüboyim sentong nung gari jenti amshir, ajisüaka arishi küm 44 tain, Sharmila-i cycle nung senzüa state Chief Minister Okram Ibobi Singh’er jila, Thoubal nung nüboyimdar.
Thoubal ya Manipur yimtiba, Imphal nungi kilometer 45 pilar lir, aser iba ya March 4 aser 8 nü assembley election agitsü aliba district 9 rongnung ka lir.
Sharmila-i state nungi Armed Forces Special Powers Act agientsü atema küm 16 tashi lumia takhangba agüja aruba sülen yaküm anen, aser iba mapang nung lai iba Act anema lai yimtenren lenmang ajanga raratsü ta shia lar party, Peoples Resurgence & Justice Alliance tenteta liasü. Lai asemben tashi chief minister inyaker aser Congress lenir, Ibobi Singh den tokteptsü.
Tanü lai, “Yangi ni local nüburtem ajurur. Ni mera tasen agiba atema parnok pelar aser tamang akar. Parnoki temelenshi aginer aser Congress agi laktetogo,” ta ashi.
Sharmila pusemertemi, lai temelenshi bener arutettsü ta amanger, ano külen Singh pusemertemibo, tatem nungbo paisa takok angutsü ta amanger.
Thoubal nung tetsür ka tenüng agi, Kamala Devi-i, “Ibobi-i takok aiben nguogo. Ajisüaka tango Sharmila lir, anungji temelenshi tulu adoktsü ta onoki bilemer. Lai assembly nung AFSPA anema raraba ajanga tensa melenshitsüa akok,” ta ashi.
“Onoki candidates asemi tokteptsü (Thoubal menden atema) ta angashiogo, saka Ibobi Singh-i takok angutsü,” ta Thoubal nung alir Ashok Singh-i ashi.
“Lai wako, posters mesüra election senden tulu dak tamang makar. Tongmelang leniri constituency nung nüburtem ajurua senzür, aser parnok tebilemtsü onüktem meteta lir,” ta PRAJA nung tongti lenir kati ashi.
Taruba election nung PRAJA-i candidate 20 bosa toktepdaktsütsü sentong lir, ajisüaka tang tashi nungbo candidate 5 dang sangdonga lir.