Sharon Stone-i tebur aser tetsür bendangba tsütsü jembir

November 08, 2015 : Hollywood nung tebur aser tetsür tsüngda sen agütsüba yimya nung tebendang tulu lir ta ashidang, actress Sharon Stone-i, “Basic Instinct” film nung kanga takok ngua shilem agitetba sülen ang süng kü nem tebur dang nungi sen kanga agi tajemba agütsü, ta ashi.
Tetsür temeten tsütsü advocate, arishi küm 57 tain, Sharon-i, 1992 küm ‘Basic Instinct’ film nung shilem agiba sülenbo film nung shilem agitsü kanga tasak aküm, ta ashiba People magazine ajanga metetdaktsü.
“Basic Instinct film sülen shingaia sen peria magütsütet. Ni kü manager den joka nung mener nüktzü yima, sen magütsü tashi kecha nunga shilem magitsü ta ni ashiba bilemteter,” ta Stone-i ashi.
Lai, “Kü nem tebur dang nungi sen kanga tajemba agütsü,” ta shisem.
Stone-i, iba yimya ya Hollywood nung dang masü saka tanga mapa nunga benshir, anungji iba ya melenshitsü nüngdaker,” ta ashi.
Film nung shilem agitsü tenzükba sülen kanga okrongba mapang hotel nung ‘waitress’ dena inyakba, ni bilemteter, ta lai ashi.
“Ni hotel nung tangar tsülemba den külemi atem ajak meyua liasü. Tetsür noklang nung shilem 50 tashi kinungbo den balar lir aser pei tanur mesütsü asoshi sen aatsü atema tangar tebur dang ‘hai’ ta ashitsüsa akümer,” ta Sharon-isa ashi.