Shashank Manohar BCCI Tir menden nungi anener

New Delhi, May 10 (Agencies): Shashank Manohar Board of Control for Cricket in India (BCCI) Tir menden nungi anenogo.
Taoba mapang okatsür alisang, arishi küm 59 tain Manohar-i 2008-2011 tashi BCCI Tir menden abenba sülen N. Srinivasan-i pa melenzüka BCCI Tir menden benok.
Tesülen, taoba BCCI Tir, Jagmohan Dalmiya ajungbena 2015 küm September ita asüba sülen Manohar-i Dalmiya melenzüka October ita nungi tenzüka BCCI Tir menden tanaben abentsü tenzük.
“Ni BCCI Tir menden nungi anenba osang metetdaktsür. Ano, BCCI tenüng nung abenba International Cricket Council (ICC) mendenbuba mendena toktsür. Ni BCCI lenisütsü menden abendang ni nungita yariba den külemi, kü den amalitepa inyaker ajunga dang pelaba lemsateper. BCCI-i tarutsü nunga cricket asayatsüren temaba jenjang nung ajungkettsütsü asoshi sarasademtsür,” ta Manohar-i BCCI Secretary, Anurag Thakur den shiti ka ajanga lemsatep.
Manohar-i tan BCCI Tir menden toktsüba ajanga pa BCCI Tir rong nung mapang tatsütiba Tir menden abener lenir akümer lir.
ICC nung independent chairman menden abentsü nükjidong nung Manohar-i BCCI Tir aser ICC mendenbuba menden toktsüba osang angazükogo.
Linük ka nung tentetba tematiba cricket tentet Tir menden abener ka nem ICC lenisang akümtsü temeten magütsütsü asoshi ICC-i tawa Dubai nung lemtetshi aser iba yongji Manohar-i tan BCCI Tir mendenji toktsür lir.
Shinga nema memetetdaktsüi vote agütsütepba sülen ICC indang mezüngbuba independent chairman tan May ita shimtsü renema lir aser iba election nung Manohar-i takok ngura, pai iba mendenji 2021 küm tashi abentsü.
Ano külen, Manohar melenzüka BCCI Tir menden abentsü asoshi Anurag den külemi, Indian Premier League (IPL) chairman, Rajeev Shukla aser Maharashtra Cricket Association (MCA) Tir, Ajay Shirke nati terenemshiba agiba osanga angazükogo.
Manohar melenzüka BCCI Tir tasenba shimtsü asoshi Special General Meeting (SGM) anogo 15 tsüngda ayonga amentsü sentonga renemogo.