Shashank Manohar ICC Chairman shimogo

Mumbai, May 12 (Agencies): Tawa Board of Control for Cricket in India (BCCI) Tir menden toktsüsang, Shashank Manohar International Cricket Council (ICC) nung 1 buba independent chairman inyaktsü asoshi tanü, Brehostibar nü shimogo.
ICC nung temelenshi agitsü asoshi tongti shilem agisang, Manohar-i BCCI Tir menden toktsüba den külemi, BCCI tenüng nung abenba ICC mendenbuba mendena tan Mongolbar nü tokja liasü.
“ICC nung Chairman inyaktsü asoshi ni shimba atema ICC director ajunga dang pelaba metetdaktsür. Tongti menden abentsüsa kü dak temulung alemba atema kanga pelar,” ta arishi küm 58 tain Manohar-i tanü metetdaktsü.
Manohar-i taoba mapang ICC mendenbuba abendang ICC temzüng yanglushia India, England aser Australia nungi lenirtemi alima ajunga nung cricket asaya ketdang asür, ICC lenisütsüren abentsüsa jenjang 2014 küm bener aruja liasü.
Iba temelenshi agiba den sentaktepa, ICC nung joko Tir malitsü saka ICC lenisütsü mendenji independent chairman-i abentsü asoshi Edinburgh nung amenba ICC senden nung agizük.
Taoba mapang okatsür alisang, Manohar-i 2008-2011 tashi BCCI Tir menden aben aser taoba BCCI Tir, Jagmohan Dalmiya asüba sülen 2015 küm October ita nungi tenzüka, Manohar-i BCCI Tir menden tanabenren abentsü maongka angu.
“Manohar-i ICC mendenbuba menden abentsü jenjang tajung anguba ajanga India ajunga nem konang nungsang bener arutsüogo. Cricket jenjang tajungba kümdaktsütsü asoshi BCCI-i ICC den amaliteptsü nangzüker,” ta BCCI Secretary, Anurag Thakur-ia tanü metetdaktsü.