Shashi Kapoor ‘Lifetime Achievement Award’ angutsü

Mumbai, Sep 29 (Agencies): Kanga dang nüngtugu actor, Shashi Kapoor taküm ‘Dadasaheb Phalke Award’ anguba sülen ano tang Mumbai nung, 6buba Jagran Film Festival tembangba sentong nung ‘Lifetime Achievement Award’ agütsütsü renema lir.
Arishi küm 77 tain, Shashi Kapoor ya film-i kechi ashir aji angateta kanga bendanga shilem agir actor ka lir aser pai kodanga mamatetba “Satyam Shivam Sundaram”, “Trishul”, “Kabhi Kabhie”, “Vijeta” aser “Kalyug” film tem nung tongti shilem agia lir. Iba den külemi pa Bollywood nung tubor aser aso-ajen tajungtiba rongnung ka lir.
“Shashi Kapoor nem ‘Lifetime Achievement Award’ agütsütsü atema onok kanga pelaseter. Pai actor aser producer ka ama cinema nung kanga bendanga agüja shisa tasen aika benoka inyakba ajanga temelenshi tajung aika bentsür aruogo,” ta Jagran Film Festival nung strategic consultant, Manoj Srivastava-i sangdong ka ajanga metetdaktsüogo.
Srivastava-i, “Pai iba senpet agizüktsü kanga mulungsoa agizükogo,” ta shisem.
Taküm küm tetenzüklen Mumbai nung sentong balaka munga liasü aser iba sentong nung Shashi Kapoor ‘Dadasaheb Phalke Award’ agizüktsü atema sabangi atudang wheelchair ka nung nunger tua liasü. Iba award agizüker külen pa akümtsübu agütsüba temaitsü menürema teben mateper mokrema liasü.
Tang takadak ‘Jagran Film Festival’ ya Mumbai tonguogo aser October 4 nü tembangtsü sentong lir.
Jagran Film Festival, 2015 ya Delhi nungi tenzüka Kanpur, Lucknow, Allahabad, Varanasi, Agra, Meerut, Dehradun, Hisar, Ludhiana, Patna, Ranchi, Jamshedpur, Raipur, Indore aser Bopal yimtitem nung munga jajaba sülen Mumbai nung tembangtsü.